
第一世噶玛巴教言集1KM31རྣམ་བཞི་རྒྱུད་གྲོལ་ཞེས་བྱ་བ་བཞུགས་སོ། །
1-2-208a
༄༅། །རྣམ་བཞི་རྒྱུད་གྲོལ་ཞེས་བྱ་བ་བཞུགས་སོ། །
༄། །རྣམ་བཞི་རྒྱུད་གྲོལ་ཞེས་བྱ་བ་ཕྱག་རྒྱ་ཆེན་པོ་ཨིནྡྲ་བྷུ་ཏི་བར་པས་མཛད་པ།
༄༅། །རྣམ་བཞི་རྒྱུད་གྲོལ་ཞེས་བྱ་བ་བཞུགས་སོ། །རྒྱ་གར་སྐད་དུ། བི་ཙ་ཏུར་ཏནྟྲ་མུཀ་ཏ་ནཱ་མ། བོད་སྐད་དུ། རྣམ་བཞི་རྒྱུད་གྲོལ་ཞེས་བྱ་བ། ཡང་དག་པའི་བླ་མ་རྣམས་ལ་ཕྱག་འཚལ་ལོ། །འཇིག་རྟེན་གསུམ་གཙོ་བླ་ན་མེད། །སྲས་བཅས་རྣམས་ལ་ཕྱག་འཚལ་ཏེ། །ཡང་དག་དོན་ལ་འཇུག་པ་ཡི། །སེམས་ཀྱི་གེགས་རྣམས་བསལ་བར་བྱ། །འདུ་བྱེད་ཟག་བཅས་མི་རྟག་པ། །སྟོང་དང་བདག་མེད་རྣམ་པ་ཡིས། །གང་
1-2-208b
ཟག་བཞི་ཡི་རྒྱུད་གྲོལ་བའི། །ཐབས་དང་ཤེས་རབ་བསྟན་པ་ཡིན། །འཆི་བའི་དུས་ལ་ངེས་མེད་དེ། །ནམ་ཞིག་འཆི་བར་ཤེས་གྱུར་ཀྱང་། །ལོང་ཡོད་སྙམ་པའི་བདག་སེམས་འཁྲུལ། །མ་ངེས་མི་རྟག་འཆི་རྐྱེན་མང་། །ངེས་པ་མེད་པར་འཆི་བར་འགྱུར། །ཤི་བའི་འོག་ཏུ་མེད་པ་དང་། །བེམ་པོ་སོགས་པར་མི་འགྱུར་ཏེ། །སླར་ཞིང་སྲིད་པར་སྐྱེ་བར་འགྱུར། །མི་དགེའི་འབྲས་བུ་རྣམ་སྨིན་པས། །རྣམ་སྨིན་རྩུབ་ལ་མི་ཟད་དེ། །འདི་ན་རང་དབང་ཡོད་པ་ལ། །བདེ་བར་འདོད་ན་མི་དགེ་སྤོངས། །རྒྱུ་མཐུན་གོམས་པའི་འབྲས་བུ་ནི། །འཕེལ་ཞིང་བཟློག་པ་ཤིན་ཏུ་དཀའ། །དེ་དག་སྤོང་བར་འདོད་གྱུར་ན། །རྒྱུ་ཡི་དུས་ན་སྤོང་བར་གྱིས། །ལོག་པའི་ལམ་དུ་ཞུགས་པ་ཡིས། །ཕུན་སུམ་ཚོགས་པ་ཐོབ་མི་འགྱུར། །ལོ་ཏོག་ཕུན་སུམ་ཚོགས་འདོད་ན། །མི་དགེ་སྤོངས་ལ་དགེ་བ་གྱིས། །རྒྱུ་འབྲས་ལས་ནི་ཤིན་ཏུ་ཕྲ། །ལུས་ངག་ཡིད་གསུམ་རྟ་རྒོད་ལ། །ཤེས་བཞིན་དྲན་པས་ལེགས་པར་སྡོམས། །མ་རྟོགས་ཁ་ཚོན་མ་གཅོད་གཅིག །མི་དགེ་བཅུ་དག་སྤང་བྱས་ཤིང་། །དགེ་བ་བཅུ་ལ་བརྟེན་བྱས་ན། །གོང་མ་ཉིད་ལས་ལྡོག་པར་འགྱུར། །བརྟགས་ན་ཁམས་གསུམ་སྲིད་པ་དག །ལྷ་མི་བདེ་འགྲོའི་གནས་ཡིན་ཀྱང་། །ཐམས་ཅད་སྡུག་བསྔལ་ལས་མ་འདས། །འདོད་པ་དག་དང་གཟུགས་དག་དང་། །གཟུགས་མེད་དག་ཏུ་སྐྱེས་ཀྱང་ལྟུང་། །འཁོར་
1-2-209a
༄༅། །བའི་སྡུག་བསྔལ་མཐའ་དག་ལས། །ཡིད་ནི་ངེས་པར་འབྱུང་ནས་ནི། །གང་ཞིག་བསིལ་བར་འདོད་པ་ཡིས། །རང་གི་གཉེན་པོ་ཉིད་དང་སྦྱར། ཁས་བླངས་བཞིན་དུ་རྗེས་སུ་བསྲུང་། །དེ་ནི་སྤོང་བའི་སེམས་གསོར་རུང་། །བསམ་པས་སྤང་བྱ་སྤོང་བ་གང་། །དེ་ནི་རྣམ་དག་ཚུལ་ཁྲིམས་ཡིན། །རང་ཉིད་གཅིག་པུ་འཁོར་བ་ལས། །ཐར་པ་ཐོབ་འདོད་འབད་གྱུར་ཀྱང་། །བླ་མེད་བྱང་ཆུབ་མི་ཐོབ་ཅིང་། །རང་སངས་རྒྱས་སུ་ལྟུང་བས་ན། །སེམས་ཅན་ཐམས་ཅད་མདུན་བྱས་ཏེ། །ཐུན་མོང་སྨོན་འཇུག་རྣམ་གཉིས་ལ། །རྒྱུ་དང་འབྲས་བུའི་དབྱེ་བ་ཡིས། །སེམས་བསྐྱེད་རྣམ་པ་གཉིས་སུ་གསུངས། །བྱ་བའི་ཡུལ་ལ་དམ་བཅའ་དང་། །བྱེད་པའི་ཁྱད་པར་ཐོབ་པ་སྟེ། །ཁྱད་པར་བསྟེན་པ་མཆོག་སེམས་བསྐྱེད། །དེ་དག་གཞན་དོན་གཙོར་སྤྱད་དེ། །བྱང་ཆུབ་སེམས་དཔའི་ལམ་དུ་གསུངས། །བསླབ་བྱ་སློབ་དང་ཕན་ཡོན་ཤེས༑ ༑ལྟུང་བའི་དབྱེ་བ་ཤེས་པ་ཡིས། །ཀུན་ནས་དཀྲིས་པ་ཆེ་འབྲིང་གསུམ། །ཀུན་སློང་བསམ་པ་བཟང་ངན་ཡིན། །ཉོན་མོངས་པས་ནི་མ་དཀྲིས་པ། །དེ་དག་ཕྱིར་བཅོས་གསོ་བ་ནི། །ཉན་ཐོས་ལ་སོགས་སོ་སོ་ཐར། །རྫ་ཡི་བུམ་བཅག་འཆོས་པ་འདྲ། །བླང་ཞིང་བསྐྱར་བས་ཟངས་དང་མཚུངས། །བསླབ་པ་གསུམ་ལ་གནས་པ་ཡིས། །ཚེ་གཅིག་འབྲས་བུ་ཐོབ་བྱའི་ཕྱིར། །རྡོ་རྗེ་ཐེག་པར་འཇུག་པར་བྱ། །འབྲས་
1-2-209b
བུ་ཚེ་འདིར་མ་ཐོབ་ཅིང་། །ལེ་ལོ་ཅན་ལ་བར་མ་དོར། །མྱུར་བ་ཉིད་དུ་མངོན་འཚང་རྒྱ། །ཐེག་ཆེན་གསང་བ་མི་ཤེས་ཤིང་། །མངོན་པར་དབང་བསྐུར་མ་ཐོབ་ན། །ཕ་རོལ་ཕྱིན་པའི་གཞུང་ལུགས་ཀྱིས། །སྐུ་གསུམ་མངོན་དུ་བྱེད་མི་ནུས། །དེ་ཕྱིར་མྱུར་དུ་སངས་རྒྱས་ཀྱི། །གོ་འཕང་ཐོབ་བྱེད་ལམ་རྟོགས་བྱ། །སྨིན་ལམ་དབང་དང་གྲོལ་ལམ་ཐབས། །བསྐྱེད་རྫོགས་ཡན་ལག་བཅས་པའོ། །གྲོལ་བྱེད་ཐབས་ལ་བརྟེན་པ་ལ། །རྣམ་རྟོག་འགོག་པར་བྱེད་པའི་ཐབས། །རླུང་གི་སྦྱོར་བ་བསྟེན་པ་དང་། །ཐ་མལ་ཞེན་པ་སྤོང་བས་ན། །སྒྱུ་ལུས་བསྒོམ་པར་བྱ་བའོ། །རླུང་འགོག་ཐབས་ལ་རྣམ་གསུམ་ཏེ། །སྔོན་འགྲོ་དངོས་གཞི་རྗེས་གསུམ་མོ། །སྔོན་འགྲོའི་གདམས་ངག་རྣམ་གསུམ་ལ། །དབེན་པར་བདེ་བའི་སྟན་འདུག་སྟེ། །བསམ་གཏན་ཡན་ལག་ལྔས་གནས་ལ། །རྟོག་པ་མི་སྤྲོ་བསྡུ་བར་བྱ། །ཐིག་ལེ་དཀར་པོ་སྲན་མ་ཙམ། །སྣ་རྩེ་གཉིས་དང་སྒོ་གཉིས་སུ། །མ་ཡེངས་རྣལ་འབྱོར་པ་ཡིས་བསྒོམ། །རྩ་ལ་བརྟེན་ནས་སེམས་བཟུང་སྟེ། །རྩ་གསུམ་པོ་ལས་དབུ་མ་ཉིད། ཁྱད་པར་གསལ་བ་དེ་ཉིད་ལ། །ངེས་པ་ཉིད་དུ་དམིགས་པར་བྱ། །རླུང་ལ་བརྟེན་པའི་རྣལ་འབྱོར་ནི། །རླུང་གི་ཁ་དོག་རྣམ་གསུམ་དུ། །སྣ་རྩེའི་སོར་བཞི་ཙམ་ནས་ནི། །ནང་དུ་དྲག་ཏུ་རྔུབས་པ་ཡིས། །རོ་རྐྱང་གཉིས་ནས་ཞུགས་ནས་ནི། །དབུ་མའི་ནང་དུ་ཞུགས་པ་དང་། །མ་
1-2-210a
༄༅། །དག་དངོས་པོ་བརྒྱད་ལ་སོགས། །ཐམས་ཅད་ལྟེ་འོག་སོར་བཞི་ནས། །ཕྱིར་ཐོན་རླུང་ནད་ཐོན་པར་བསམ། །རླུང་གི་སྦྱོར་བས་བསྡམས་པ་གང་། །མ་ཐུབ་དུས་སུ་སྤྱི་གཙུག་ནས། །ནམ་མཁའ་ལ་ནི་བཏང་བར་བྱ། །དེ་ཉིད་འགྲོ་ལྡོག་བརྟན་པར་བྱ། །གཏུམ་མོའི་དངོས་གཞིའི་གདམས་པ་ལ། །རྡོ་རྗེ་སྐྱིལ་ཀྲུང་གནས་པ་འམ། །ཡང་ན་ཙོག་པུ་ཕྱེད་ཀྲུང་གིས། །གནས་ལ་སྒྱུ་མ་ལྟ་བུའི་བློས། །ལུས་ལྷར་བསྐྱེད་དེ་རང་ལུས་ཀྱི། །རྩ་གསུམ་འདུས་པར་ཨ་ཤད་བསམ། །རྐང་མཐིལ་གཉིས་སུ་རོ་རེ་རེ། །དེ་ལ་རླུང་གིས་གཡོས་པ་ལས། །མེ་བྱུང་ནས་ནི་ཨ་ལ་ཕོག །ཨ་ཤད་དམར་མོ་དེ་ཉིད་ལས། །འབར་ཏེ་མེ་ཡིས་གང་བ་དང་། །ལུས་ཀྱི་སྟོང་ར་བསྒོམ་པ་རྣམས། །གང་བདེ་དག་ཏུ་བྱ་བ་འོ། །དེས་ནི་བདེ་དྲོད་སྐྱེ་བར་འགྱུར། །གལ་ཏེ་བདེ་བ་མ་སྐྱེས་ན། །དྲོད་ལས་བདེ་བ་འབྱུང་བར་བྱ། །དེ་ཡང་སྟེང་སྒོ་ལ་བརྟེན་ནས༑ ༑གཏུམ་མོའི་མེ་ཡིས་བྱང་སེམས་དབབ། །ཐིག་ལེ་དབབ་དང་བསྐྱིལ་དང་བཟློག །ལཱཀྵ་མ་ཡི་མན་ངག་བཞིན། །དེས་ནི་དགའ་བདེ་སྐྱེ་བར་བྱེད། །དགའ་བས་སེམས་ལ་ཕན་འདོགས་ལ། །བདེ་བས་ལུས་ལ་ཕན་འདོགས་ཏེ། །ལུས་སེམས་གཉིས་པོ་ཚིམ་པར་བྱེད། །དེ་ལས་མི་རྟོག་ཏིང་འཛིན་སྐྱེ། །གཡས་རྩ་གཡོན་རྩ་དབུ་མ་ལ། །བརྟེན་པའི་ཉམས་སྣང་འཆར་བར་འགྱུར། །དེ་ལྟར་ཏིང་འཛིན་སྐྱེས་པ་
1-2-210b
དང་༑ ༑རླུང་སེམས་ལས་སུ་རུང་བས་ན། །ལུས་དང་ཡུལ་ལ་དབང་ཐོབ་པས། །འཕོ་དང་གྲོང་འཇུག་ཐོགས་པ་མེད། །གྲོང་འཇུག་གིས་ནི་ལུས་བརྗེས་ནས། །སེམས་ཅན་དོན་དུ་འཇུག་པར་བྱ། །རླུང་ལ་སྦྱངས་པས་ཡོན་ཏན་འཐོབ། །དྲག་པོའི་སྦྱོར་བས་ནུས་པ་འབྱུང་། །དེ་ནས་རྗེས་སྤྱོད་བྱ་བ་ནི། །རྩ་རླུང་བྱང་སེམས་ཡི་གེ་ནི། །ལུས་ངག་ཡིད་གསུམ་མི་མཐུན་ཕྱོགས། །སྔ་མ་སྤངས་ཤིང་མཐུན་པར་བསྒྲུབ། །ཚུལ་བཞིན་མ་ཡིན་རྟོག་པ་སྤངས་ནས་ནི། །ཚུལ་བཞིན་ཡིད་ལ་བྱེད་པ་བསྒྲུབ་པའི་ལམ། །ཚུལ་ཁྲིམས་ལ་བརྟེན་ཏིང་ངེ་འཛིན་ཐོབ་སྟེ། །དེ་ལ་བརྟེན་ནས་ཡེ་ཤེས་རྣམ་པར་དག །ཡུལ་དང་ལུས་དང་དབང་པོའི་འཁྲུལ་སྣང་ལ། །ལམ་དུ་བསླང་བས་བོགས་འདོན་སྐྱོན་སེལ་བ། །གསང་བའི་ཐབས་དང་དམིགས་པ་རྣོ་བ་དང་། །རྣལ་འབྱོར་སྟོབས་ཀྱིས་སྐྱོན་ཉིད་ལམ་དུ་བསླང་། །བར་ཆད་དངོས་གྲུབ་འཆར་བ་གསེར་འགྱུར་རྩི། །བླ་མ་ཉིད་ཀྱིས་རང་བྱིན་བརླབ་པར་བྱ། །ལམ་བཞི་ཐབས་ཀྱི་རྣམ་པ་བཞི་པོ་ཡིས། །གང་ཟག་བཞི་པོའི་རྒྱུད་ནི་གྲོལ་བར་བྱེད། །ཐ་མལ་བསྐྱེད་པའི་རིམ་པ་ལྷ་སྐུ་ལ། །གསལ་དང་དག་དང་སྣང་བར་འཆར་བའོ། །དབང་པོ་འབྲིང་གིས་ཐབས་ལམ་གཏུམ་མོ་བསྒོམ། །རླུང་གི་རྣམ་རྟོག་བདེ་བར་བསྒྱུར་བྱེད་པའོ། །རབ་ཀྱི་ཐབས་ནི་བདེ་བ་ལམ་དུ་བྱེད། །དཔའ་མོའི་ལམ་ནི་ལོགས་སུ་ཤེས་པར་
1-2-211a
༄༅། །བྱ། །དབང་པོ་ཡང་རབ་ཕྱག་རྒྱ་ཆེན་པོ་ཡི། །གཅིག་ཆོད་ལམ་གྱིས་སྐུ་གསུམ་མངོན་དུ་འགྱུར། །གདོད་ནས་མ་སྐྱེས་སྤྲོས་དང་བྲལ། །ཐོག་མཐའ་དབུས་ནི་མེད་པའི་བདག །མི་འགྱུར་ཀུན་གྲོལ་ཁྱབ་པ་པོ། །རང་རིག་མ་བཅོས་ལྷན་ཅིག་སྐྱེས། །རྣམ་རྟོག་ཆོས་སྐུར་རང་བྱུང་ཡིན། །རང་བཞིན་འོད་གསལ་སྐྱེ་འགག་མེད། །ནམ་མཁའ་ལྟ་བུར་གནས་མེད་པའོ། །སེམས་ཅན་གདོད་ནས་སངས་རྒྱས་ལ། །འོན་ཀྱང་གློ་བུར་དྲི་མས་སྒྲིབས། །སེམས་ནི་ཡེ་ཤེས་འབྱུང་བའི་རྒྱུ། །སངས་རྒྱས་གཞན་དུ་མ་ཚོལ་ཅིག །སྐུ་གསུམ་ཡེ་ཤེས་ལྔ་ལྡན་པ། །དེ་ཉིད་དབང་པོ་ཡང་རབ་ལམ། །མཉམ་རྗེས་གཉིས་སུ་མེད་པར་སྤྱོད༑ ༑དབྱིངས་དང་ཡེ་ཤེས་དབྱེར་མེད་པ། །ཆོས་ཀྱི་སྐུ་ཡི་ངོ་བོར་གྲུབ། །ཡུལ་ནི་ཆུང་ངུ་ཆེན་པོ་ཡི། །སྣང་བས་གཟུགས་སྐུ་གཉིས་སུ་བརྗོད། །ཇི་ལྟར་ལྷ་ཡི་སིལ་སྙན་དག །རྟོག་པ་མེད་པར་སྒྲ་འབྱུང་བཞིན༑ ༑ཡང་དག་དོན་ནི་དག་པའི་དོན། །ལྟ་བ་མཐའ་བྲལ་ཆེན་པོ་ཡི། །བསྒོམ་པའི་ལམ་ནི་གཅིག་ཆོད་དོ། །སྤྱོད་པ་དགག་སྒྲུབ་མེད་པ་འོ། །འབྲས་བུ་སྤངས་ཐོབ་མེད་ཅེས་བྱ། །ཡང་དག་ཉིད་ལ་ཡང་དག་བལྟ། །ཡང་དག་གོམས་པ་རྣམ་པར་གྲོལ། །འཇུར་བུས་བཅིངས་པའི་སེམས་ཉིད་འདི། །ཀློང་ན་གྲོལ་བར་ཐེ་ཚོམ་མེད། །སྤྲོས་ལྡན་གྲངས་མེད་གསུམ་སྤྱོད་ཀྱང་། །སྤྲོས་མེད་ཚེ་གཅིག་ཁོ་ན་ཡིས། །ཡང་
1-2-211b
རབ་སྐད་ཅིག་མངོན་བྱང་ཆུབ། །དབང་པོ་རྣོ་དང་བརྟུལ་པོ་ཡིས། །སྤྲོས་དང་སྤྲོས་མེད་སྤྲོས་པ་དང་། །རྒྱུ་འབྲས་ཐེག་པའི་བྱེ་བྲག་གིས། །ཉེ་རིང་ལམ་དུ་བརྟག་པར་གྱིས། །རྨི་ལམ་ནང་ན་ལོ་བརྒྱ་ཞིག །སྐད་ཅིག་ཏུ་ནི་འདུ་བ་ལྟར། །དེ་བཞིན་བདག་མེད་དུས་དག་ནི། །སྐད་ཅིག་མར་ནི་འབྱུང་བར་འགྱུར། །སེམས་ཉིད་རྟོགས་པའི་རྣལ་འབྱོར་གྱིས། །ཤུགས་འབྱུང་སྤྱོད་པ་མི་དགག་ཅིང་། །བཅོས་མའི་སྤྱོད་པ་མི་སྒྲུབ་སྟེ། །མ་བཅོས་ལྷུག་པ་སྤྱོད་པའི་རབ། །འདི་ལ་ལྷ་དང་སྔགས་མེད་དེ། །གཏོར་མ་སྦྱིན་སྲེག་ཡོད་མ་ཡིན། །དེ་ལ་དམིགས་པའི་རྫས་རྣམས་དག །རྣམ་རྟོག་ཡིན་ཕྱིར་གཤིས་ལ་མེད། །དཔེར་ན་ནོར་བུ་རིན་ཆེན་བཞིན། །བླ་མ་རྡོ་རྗེ་ཅན་མཆོད་ཅིང་། །དེ་ཉིད་སྐུ་གསུང་ཐུགས་ཀྱིས་ནི། །ཡོན་ཏན་རྒྱ་མཚོ་ཐོབ་པ་དག །སྣ་ཚོགས་ནོར་བུ་ཇི་བཞིན་འབྱུང་། །སྙིགས་མའི་དུས་སུ་ཟབ་མོའི་ཆོས་ཉིད་ལ། །མོས་ཤིང་སྤྱད་པར་འདོད་པས་བསྐུལ་བ་རྣམས། །བདུད་རྩི་ལྟ་བུའི་དོན་འདིས་གསལ་བྱས་ནས། །ཟླ་དཀྱིལ་ཡར་གྱི་ངོ་བཞིན་རྒྱས་པར་ཤོག །རྣམ་བཞི་རྒྱུད་གྲོལ་ཞེས་བྱ་བ་ཕྱག་རྒྱ་ཆེན་པོ་ཨིནྡྲ་བྷུ་ཏི་བར་པས་མཛད་པ་རྫོགས་སོ།། ༈ །།
༄། །ཆོས་ཀྱི་ཚུལ་ཁྲིམས་བྱ་བ།
ཨེ་མ་ཧོཿ འགྲོ་མགོན་བྱམས་པའི་རྩལ་སྟོབས་ཅན། །བསྟན་པའི་སྒྲོན་མེ་རིན་པོ་ཆེ། །རང་སེམས་ཆོས་སྐུར་སྟོན་མཛད་པ། །སྤྲུལ་པའི་སྐུ་ལ་ཕྱག་འཚལ་ལོ། །མ་རིག་མུན་པ་རབ་
1-2-212a
༄༅། །བསལ་ཏེ། །མོས་གུས་ས་བོན་གསོ་བའི་ཕྱིར། །སྤྲུལ་པའི་རྣམ་པར་ཐར་པ་དག ཁྱད་པར་ཅན་འདི་བྲི་བར་བྱ། ཁོ་བོས་སྡེ་སྣོད་ཀྱི་ཆོས་ཀྱི་དོན་ལ་ལོ་བཅུ་བཞིར་ཉན་བཤད་བྱས་ཏེ། ཚིག་གི་ཚོགས་དུ་མ་ཁོང་དུ་ཆུད་ཀྱང་། ཡང་དག་པའི་དོན་ཅུང་ཟད་ཀྱང་གོ་བར་མ་ནུས་པ་ན། བླ་མ་རིན་པོ་ཆེའི་སྙན་གྲགས་ཐོས་པ་ལ་བརྟེན་ནས། ཐོས་བསམ་བྱས་པའི་དོན་ཡང་བསྒོམ་པར་འདུག་པས། བླ་མ་དེའི་དྲུང་དུ་འགྲོ་དགོས་སྙམ་པའི་བསམ་པ་སྐྱེས་ནས། འགྲོ་བའི་སྦྱོར་བ་བརྩམས་པས། ཁ་ཅིག་ན་རེ། བླ་མ་དེ་སྐུ་ནས་སུ་བྱོན་པ་དང་། གཤེགས་པའི་དུས་ཀྱང་ཡིན་ཟེར་བས། ཁྱེད་ཀྱིས་དེར་སོང་ཡང་ཆོས་མི་ཚར་ཏེ་འོང་ཟེར་ནས་ཐེ་ཚོམ་དང་བཅས་པར་གྱུར་ཏེ། དེའི་ཚེ་གཙུག་ལག་ཁང་གཅིག་ཏུ་རྣལ་འབྱོར་པ་བཞི་དང་མཇལ་བས། གསུམ་ཨ་ཙ་རའི་དབྱིབས་ཅན་གོས་ནག་པོ་གྱོན་པ་གསུམ་ཡིན་ཏེ། དྲུང་ཉིད་མ་ཡིན་པ་ཕ་ཚད་ན་འདུག་གོ །རྣལ་འབྱོར་པ་གཅིག་ནི་བོད་ཀྱི་དབྱིབས་ཅན་ལོ་དྲུག་བཅུ་ལོན་པ་ཙམ་གཅེར་བུ་ལ་རས་རྐྱང་གཅིག་གོན་པ་དུང་གི་རྣ་རྒྱན་ཡོད་པ། ལག་ན་ཀ་པཱ་ལ་གཅིག་ཐོགས་པ་དེ་ཁོ་བོའི་དྲུང་ཉིད་ན་འདུག་གོ །ཁྱེད་གང་ནས་བྱོན་བྱས་པས་པུ་རངས་ནས་འོངས་གསུང་། དེར་ཅི་ལ་ཕྱིན་བྱས་པས། རྒྱ་གར་རྡོ་རྗེ་གདན་དུ་དུས་མཆོད་ལ་ཕྱིན་པའི་ལམ་ཡིན་ཟེར་བ། དུས་མཆོད་དེ་ལ་གྲུབ་ཐོབ་
1-2-212b
ཐམས་ཅད་བྱོན་པ་ཡིན་ཟེར་བ། བོད་ནས་གྲུབ་ཐོབ་དུ་བྱོན་ཅེས་སྨྲས་པས། བླ་མས་གསུངས་པ། གྲུབ་ཐོབ་ཆེན་པོ་མི་དྲ་ཛོ་གི་ན་རེ། ད་རེས་ཀྱི་མཆོད་པ་འདི་ལ་བོད་ནས་གྲུབ་ཐོབ་ཆེན་པོ་གཉིས་བྱོན་པ་ཡིན༑ དྷརྨ་ཤཱི་ལ་དང་། དྷརྨ་ཀཱིརྟི་གཉིས་ཡིན་གསུང་། དེ་ཡང་དྷརྨ་ཤཱི་ལ་ནི། བོད་སྐད་དུ་ཆོས་ཀྱི་ཚུལ་ཁྲིམས་བྱ་བ་ཡིན། འཆི་མེད་གྲུབ་པ་ཞེས་བྱ་བའི་གདམས་ངག་ཡོད། བོད་ཡུལ་གྱི་ནུབ་ཕྱོགས་ན་ཡིན་གསུངས༑ དེས་ཀྱང་དེར་ཕྱིན་པ་ཡིན་གསུང་། དྷརྨ་ཀཱིརྟི་ནི་བོད་སྐད་དུ་ཆོས་ཀྱི་གྲགས་པ་བྱ་བ་ཡིན། ལམ་རྩ་དང་རླུང་ལ་བརྟེན་ནས་ཕྱག་རྒྱ་ཆེན་པོ་ལམ་ཆིག་ཆོད་ཀྱི་གདམས་ངག་ཡོད་པ་ཡིན། བོད་ཡུལ་གྱི་སྨད་ན་བཞུགས་གསུང་། དེ་ཉིད་ད་ལྟ་བླ་མ་དབུ་སེ་ཞེས་གྲགས་པ་དེ་ཉིད་ཡིན་པར་འདུག །ངེད་ཀྱང་དེར་འགྲོ་བ་ཡིན་གསུང་ངོ་། །ཁོ་བོ་སྨྲས་པ། བླ་མ་དེ་གྲུབ་ཐོབ་ཏུ་གྲགས་པ་གྲུབ་ཐོབ་ཡིན་པ་མཐུན་པར་འདུག ༑བདག་ཀྱང་དེར་འགྲོ་འདོད་པ་ཡིན་ཏེ། བླ་མ་དེ་སྐུ་ནས་སུ་བྱོན་པ་དང་། གཤེགས་པའི་དུས་ཡིན་ཞེས་ཐོས་པས་ཆོས་མ་ཚར་གྱི་དོགས་པ་ཐེ་ཚོམ་དང་བཅས་པར་གྱུར་ཏོ། །བླ་མས་གསུངས་པ། གདུལ་བྱ་གང་ཞིག་གཅིག་ཙམ་གྱི། །དོན་དུ་ཐུབ་པ་བསྐལ་པར་བཞུགས། །དེ་ཡང་མྱུར་དུ་སྨིན་མཛད་དེ། །དྲོད་གཤེར་ལྡན་པའི་མྱུ་གུ་བཞིན། །ཞེས་གསུངས་པས། སངས་རྒྱས་དང་བྱང་ཆུབ་སེམས་དཔའ་
1-2-213a
༄༅། །རྣམས་སེམས་ཅན་གྱི་དོན་དུ་གསོལ་བ་བཏབ་ན་བསྐལ་པར་བཞུགས་པར་བཤད་པ་ཡིན་པས། མོས་གུས་དང་མ་བྲལ་བར་མྱུར་དུ་སོང་དང་། ཁྱོད་ཀྱི་ཆོས་ཅི་ནས་ཀྱང་ཚར་བར་བྱེད་དོ་གསུང་ངོ་༑ ༑གསུང་དེས་ངེས་པར་ཐེ་ཚོམ་ཆོད་ནས་དགའ་བ་ཁྱད་པར་ཅན་སྐྱེས་སོ། ཁྱེད་རྒྱ་བོད་གཉིས་ཀྱི་གྲུབ་ཐོབ་མང་པོ་དང་མཇལ་ནས་འདུག་པས་ཡང་དག་པའི་གདམས་ངག་གཅིག་ཞུ་བྱས་པས། ཆོས་ཉན་ཤད་མང་པོ་བྱེད་པ་དེ་རྣམས་བཀའ་གདམས་ངག་ཡིན་མོད་གསུངས་ནས་མ་གནང་ངོ་། །ཡང་ཡང་ནན་ཏན་ཆེ་བར་ཞུས་པས། རྣམ་བཞི་རྒྱུད་གྲོལ་ཞེས་བྱ་བ་གདམས་ངག་འདི་གྲོ་ག་ལ་བྲིས་ཟིན་པ་གཅིག་གནང་ནས་དོན་ཡང་ལེགས་པར་གསུངས་སོ། །དེ་ནས་གར་བཞུད་ཆ་མེད་པར་གྱུར་ཏོ། །དེ་ཉིད་ཀྱི་རྗེས་སུ་འབྲངས་ཏེ་བཤད་པ་བཤོལ་ཏེ། དཔེ་ཆ་ལ་སོགས་པ་སྤོང་དག་བྱས་ནས། ཡིད་ལ་བྱེད་པ་གཞན་མ་བྱས་པར་རིན་པོ་ཆེའི་དྲུང་དུ་ཕྱིན་པ་དང་། རིན་པོ་ཆེའི་ཞལ་ནས། ཆོས་ཉན་བཤད་བྱེད་པ་ཡང་བཟང་པོ་ཡིན་ཏེ། ཆོས་བརྒྱད་ཀྱི་ཞེན་པ་གཅིག་ཡོད་པས་བསྒོམ་དུ་འོངས་པ་ལེགས་སོ་གསུངས་ནས། གོང་གི་རྣལ་འབྱོར་པ་བཞི་པོ་དེ་གང་དུ་བཞུད། འདིར་བྱོན་ནམ་མ་བྱོན་དྲི་དགོས་སྙམ་པ་ལས། ཁྱོད་ཀྱི་དེ་སང་ཙམ་ན་བྱས་པས་ཆོག་གསུངས་ནས་ཞུ་མ་སྤོབས་སོ། །དེ་ནས་དུས་ཅུང་ཞིག་ལོན་པ་དང་། རིན་པོ་
1-2-213b
ཆེ་ཉིད་ཀྱིས་གཞན་ཁ་ཅིག་ལ་ལོ་རྒྱུས་དེ་རྣམས་ཐོར་བུ་ཙམ་གསུངས་པས། ཐམས་ཅད་ངོ་མཚར་སྐྱེས་པ་ལ་ཁོ་བོ་ཡང་རྟགས་དང་རྟགས་ཅན་ཤིན་ཏུ་མཐུན་པར་སྒྲོ་འདོགས་ཤུགས་ལ་ཆོད་དོ། །དེ་ནས་ཡང་ལོ་རྒྱུས་དེ་ཟབ་ཏུ་ཞུ་བའི་ཆེད་དུ་མཆོད་ཆུང་གཅིག་བྱས་ནས་ཚོགས་གྲལ་དུ། བླ་མ་སྟག་དིལ་པ་ལ་སོགས་པས་ལོ་རྒྱུས་དེ་རྣམས་ཟབ་པ་གཅིག་ཞུ་འཚལ་ཅེས་ཞུས་པས། བླ་མ་རིན་པོ་ཆེའི་ཞལ་ནས། ང་ན་ནིང་ལྷ་ལུང་ན་ཡོད་པའི་དུས་སུ་རྒྱ་གར་དུ་ཕྱིན་ནས་ཛཱ་ལན་ར་ཞེས་བྱ་བའི་གྲོང་ཁྱེར་ན་རྒྱལ་པོ་རྣམ་པར་གནོན་པ་ཞེས་བྱ་བས་ཡོན་བདག་བྱས་ནས། ཧ་ཧ་སྒྲོག་པ་ཞེས་བྱ་བའི་དུར་ཁྲོད་དུ་སློབ་དཔོན་ནག་པོ་པས་ཚོགས་དཔོན་མཛད་ནས། སློབ་དཔོན་ཛཱ་ལནྡྷ་ར་པ་དང་། ཨིནྡྲ་བོ་དྷི་དང་། ཤིང་ལོ་པ་དང་། བོད་ཀྱི་གྲུབ་ཐོབ་དྷརྨ་ཤཱི་ལ་དང་། ང་དང་བདུན་གྱིས་ཚོགས་འཁོར་སྟབས་གཅིག་ཏུ་བྱས་གསུང་། དེ་ནས་ཁ་ཆེ་དང་པུ་རངས་སུ་སོང་ནས་སྟོན་པ་འདི་ཅན་དུ་ཕྱིན། ད་རེས་དང་སྐྱེ་བ་བཞིའི་སློབ་མ་ཡིན། ཐེངས་ལྔར་འཕྲད་མྱོང་། ཁོའི་ཐེ་ཚོམ་བཅད་ནས་བསྒོམ་ལ་གཞུག་པའི་ཆེད་དུ་ཕྱིན་པ་ཡིན། དེའི་དུས་ཀྱི་རྣལ་འབྱོར་པ་དེ་གསུམ་ནི། ནག་པོ་སྤྱོད་པ་བ་དང་། ཨིནྡྲ་བོ་དྷི་དང་། ཤིང་ལོ་པ་དང་གསུམ་ཡིན། ཁྱོད་སྣང་བ་དག་པས་མཐོང་བ་ཡིན། ཁྱོད་ལ་གདམས་ངག་སྟོན་མཁན་དེ་ང་ཡིན། གདམས་ངག་དེ་ཨིནྡྲ་བོ་དྷི་
1-2-214a
༄༅། །ལ་ཐོས་པས་ཤིན་ཏུ་ཟབ་པ་ཡིན། དེ་ནས་བརྗོད་བྱ་འདི་གྲོ་ག་ལ་བྲིས་ནས་ཡོད་ཅེས་ཡིད་ཆེས་བསྐྱེད་པའི་དོན་རྟགས་དང་བཅས་པ་རྣམས་གསུངས་སོ། །དེ་མ་ཡིན་པ་སྐུའི་སྤྲུལ་པ་བདོག་གམ་ཞུས་པས། དེར་མ་ཟད་པུ་རིག་ཅེས་བྱ་བ་ན། བཙུན་པ་དགེ་བའི་བློ་གྲོས་ཞེས་བྱ་བ་གཅིག་དང་། ལྡན་ཆུང་ལ་སོགས་པའི་དོན་བྱེད་པ་ཡིན། བན་དྷེའི་བླ་མ་བཻ་རོའི་དགོན་པ་ན་རྣལ་འབྱོར་པའི་ཚུལ་གྱིས་དོན་བྱེད་པ་ཡིན། འཇིག་རྟེན་གྱི་ཁམས་གཞན་ཞིག་ན་གྲགས་པ་མཐའ་ཡས་ཞེས་བྱ་བ་རྒྱལ་པོའི་ཚུལ་གྱིས་དོན་བྱེད་པ་ཡོད་ཅེས་གསུང་ངོ་། །རྒྱ་གར་ལྷོ་ཕྱོགས་ན་ཐུགས་རྗེ་ཆེན་པོའི་རྣལ་འབྱོར་བ་གཅིག་ཀྱང་ཡོད་གསུང་ངོ་། །དགེ་བར་གྱུར་ཅིག། ༈ །།
༄། །རྣམ་བཞི་རྒྱུད་གྲོལ་ཞེས་བྱ་བ།
རྒྱ་གར་སྐད་དུ། བི་ཙ་ཏུར་ཏནྟྲ་མུཀ་ཏ་ན་མཿ བོད་སྐད་དུ། རྣམ་བཞི་རྒྱུད་གྲོལ་ཞེས་བྱ་བ། ཡང་དག་པའི་བླ་མ་རྣམས་ལ་ཕྱག་འཚལ་ལོ། །འཇིག་རྟེན་གསུམ་གཙོ་བླ་ན་མེད། །སྲས་བཅས་རྣམས་ལ་ཕྱག་འཚལ་ལོ། །ཡང་དག་དོན་ལ་འཇུག་པ་ཡི། །སེམས་ཀྱི་གེགས་རྣམས་བསལ་བར་བྱ། །འདུས་བྱས་ཟག་བཅས་མི་རྟག་པ། །སྟོང་དང་བདག་མེད་རྣམ་པ་ཡིས༑ ༑གང་ཟག་གསུམ་གྱི་རྒྱུད་གྲོལ་བའི། །ཐབས་དང་ཤེས་རབ་བསྟན་པ་ཡིན། །འདུས་བྱས་ཐམས་ཅད་མི་རྟག་པ་ཉིད་དེ་སྐད་ཅིག་གིས་མི་རྟག་པ་ཉིད་དང་། རྒྱུན་གྱིས་མི་རྟག་པ་ཉིད་ཀྱིས་སྐྱེས་པ་
1-2-214b
རྣམས་རྣམ་པར་འཇིག་པར་འགྱུར་རོ། །དེ་ཡང་འཆི་བའི་དུས་ལ་ངེས་པ་མེད་དེ། ནམ་ཞིག་འཆི་བར་ཤེས་གྱུར་ཀྱང་། །ལོང་ཡོད་སྙམ་པའི་རྟོག་སེམས་འཁྲུལ། །མ་ངེས་མི་རྟག་འཆི་རྐྱེན་མང་། །ངེས་པ་མེད་པར་འཆི་བར་འགྱུར། །ཞེས་པའི་དོན་ལ་བརྟག་པར་བྱའོ། །ཤི་བའི་འོག་ཏུ་མེད་པ་དང་བེམས་པོ་ལ་སོགས་པར་མི་འགྱུར་ཏེ། ཡང་སྲིད་པར་སྐྱེ་བར་འགྱུར་རོ། །དེ་ཡང་སེམས་ཅན་དམྱལ་བ་ཆེན་པོར་སྐྱེས་ན་ཚ་གྲང་ལ་སོགས་པའི་སྡུག་བསྔལ་དཔག་ཏུ་མེད་པ་ཡོད་དོ། །ཡི་དྭགས་ལ་བཀྲེས་པ་དང་སྐོམ་པས་སྡུག་བསྔལ་ལོ། །དུད་འགྲོ་རྣམས་གླེན་ཞིང་གཏི་མུག་པ་དང་། མཐུ་ཆེ་བས་ཆུང་བ་འཇོམས་པ་ལ་སོགས་པ་སྡུག་བསྔལ་དཔག་ཏུ་མེད་དོ། །དེ་དག་མི་དགེ་བ་བཅུའི་འབྲས་བུ་རྣམ་པར་སྨིན་པ་སྟེ། མི་དགེ་བའི་ལས་ཀྱི་ལམ་བཅུ་ནི། རྣམ་སྨིན་རྩུབ་པ་མི་ཟད་པ། །འདིར་ནི་རང་དབང་ཡོད་པ་ལ། །བདེ་བར་འདོད་ན་མི་དགེ་སྤོངས། །ཞེས་གསུངས་སོ། །དབྱེ་བ་ནི། སྲོག་གཅོད་པ་དང། མ་བྱིན་པར་ལེན་པ་དང་། འདོད་ལོག་དང་། བརྫུན་དང་། ཕྲ་མ་དང་། ཚིག་རྩུབ་དང་། ངག་འཁྱལ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བའོ། །དེ་དག་གི་བྱེད་པ་རྒྱུ་མཐུན་ནི། དེ་དག་བྱེད་འདོད་པ་ཉིད་དོ། །མྱོང་བ་རྒྱུ་མཐུན་ནི། ཚེ་ཐུང་པ་དང་། དབུལ་བ་དང་། ཁྱིམ་ཐབ་མ་བསྲུངས་པ་དང་། བསྐུར་པ་མང་བ་དང་། 
1-2-215a
༄༅། །མཛའ་བོ་ཉུང་པ་དང་། མི་སྙན་པ་ཐོས་པ་དང་། ཚིག་མི་བཙུན་པ་དང་། འདོད་ཆགས་དང་། ཞེ་སྡང་དང་། གཏི་མུག་ཤས་ཆེ་བར་འགྱུར་རོ། །རྒྱུ་མཐུན་གོམས་པའི་འབྲས་བུ་ནི། །འཕེལ་ཞིང་བཟློག་པ་ཤིན་ཏུ་དཀའ། །དེ་དག་སྤོང་བར་འདོད་གྱུར་ན། །རྒྱུ་ཡི་དུས་ན་སྤོང་བར་གྱིས། །དབང་གི་འབྲས་བུ་ནི་ཡུལ་ལ་སྨིན་ཏེ། མཐུ་ཆུང་བ་དང་། མི་སྨིན་པ་དང་། འདྲུལ་པ་དང་། རྒྱུ་ལས་འབྲས་བུ་ལོག་པ་དང་། མི་ཞིམ་པ་དང་། སྡང་འདུབ་ཆེ་བ་དང་། འཕེལ་མེད་པ་དང་། ལུས་ལ་གནོད་པ་དང་། སྟན་མེད་པར་འགྱུར་རོ། །ལོག་པའི་ལམ་དུ་ཞུགས་པ་ཡིས། །ཕུན་སུམ་ཚོགས་པ་ཐོབ་མི་འགྱུར། །ལོ་ཏོག་ཕུན་སུམ་ཚོགས་འདོད་ན། །མི་དགེ་སྤོངས་ལ་དགེ་བ་གྱིས། །ཞེ་སྡང་དྲག་པོས་ཁྱི་ལ་སོགས་པའོ་བླ་དྭགས་བརྗོད་ན། སྐྱེ་བ་ལྔ་བརྒྱར་ཁྱིར་སྐྱེའོ། །དགེ་འདུན་གྱི་མེ་བླངས་ནས་ཐལ་བ་གནས་སུ་མ་སྐྱལ་ན། སྐྱེ་བ་ལྔ་བརྒྱར་དགེ་འདུན་གྱི་ལས་བྱེད་པའི་དུད་འགྲོར་འགྱུར་རོ། །བླ་མའི་གསུང་ལ་གཅིག་མ་ཉན་ན་སྐྱེ་བ་ལྔ་བརྒྱར་བླ་མ་དང་མི་མཇལ་ལོ། །བཅས་པ་ཁྱད་དུ་བསད་པ་དང་། དམ་པའི་ཆོས་སྤངས་པ་དང་༑ དཀོན་མཆོག་གི་རྫས་ལ་ཐུབ་ཆོད་བྱས་པ་དང་། བཀུར་པ་བཏབ་པ་ལ་སོགས་པའི་འབྲས་བུ་མཚམས་མེད་པ་བས་ལྕི་བ་ལ་སོགས་པ་དཔག་ཏུ་མེད་པར་སྟོན་པའི་མདོ་སྡེ་ལས་བལྟ་བར་བྱའོ། །རྒྱུ་
1-2-215b
འབྲས་ལམ་ནི་ཤིན་ཏུ་ཕྲ། །ལུས་ངག་ཡིད་གསུམ་རྟ་རྒོད་ལ། །ཤེས་བཞིན་དྲན་པས་ལེགས་པར་སྡོམས། །མ་རྟོགས་ཁ་ཚོན་མ་གཅོད་ཅིག །དེའི་ཕྱིར་མི་དགེ་བ་བཅུ་སྤང་བར་བྱ་སྟེ། དེ་ཉིད་སྤངས་པ་ལས་དགེ་བ་བཅུ་ཉིད་དུ་རབ་ཏུ་རྣམ་པར་བཞག་པར་བྱའོ། །རྣམ་པར་སྨིན་པའི་འབྲས་བུ་ནི་མི་དང་ལྷ་རྣམས་སོ། །བྱེད་པ་རྒྱུ་མཐུན་ནི་དེ་དག་བྱེད་འདོད་པའོ། །མྱོང་བ་རྒྱུ་མཐུན་དང་དབང་གི་འབྲས་བུ་ནི། གོང་མ་ལས་བཟློག་པར་ཤེས་པར་བྱའོ། །ཡང་དག་པ་ནི། མི་དང་ལྷ་རྣམས་སྡུག་བསྔལ་གྱི་རང་བཞིན་ཡིན་ཏེ། མི་རྣམས་འདོད་པ་འཚོལ་བའི་སྡུག་བསྔལ་དང་། ཡོད་པ་བརླག་པའི་སྡུག་བསྔལ་དང་། སྐྱེ་རྒ་ན་འཆི་ལ་སོགས་པའི་སྡུག་བསྔལ་དཔག་ཏུ་མེད་པ་ཡོད་དོ། །འདོད་ཁམས་ཀྱི་ལྷ་རྣམས་འཆི་འཕོ་དང་། ལྟུང་བས་སྡུག་བསྔལ་བ་དང་། ཁམས་གོང་མ་རྣམས་ཀྱང་ཟག་པ་དང་བཅས་པས་གནས་ངན་ལེན་གྱི་སྡུག་བསྔལ་ལོ། །དེའི་ཕྱིར་འཁོར་བའི་སྡུག་བསྔལ་མཐའ་དག་ལས་ངེས་པར་བྱུང་ནས་སྤོང་བའི་སེམས་དགེ་བ་ཚུལ་ཁྲིམས་ཀྱི་སྡོམ་པ་རྣམ་པར་བཞག་གོ །ངེས་པར་འབྱུང་བའི་ཚུལ་ཁྲིམས་ཀྱིས་སྡུག་བསྔལ་སྤོང་བའི་ཕྱིར་རོ། །དེ་དག་བསྙེན་གནས་དང་། དགེ་ཚུལ་དང་། དགེ་སློང་གི་རབ་ཏུ་དབྱེ་བའོ། །གཉེན་པོ་ཆུང་བ་རྣམས་ཀྱིས་ནི་བསྙེན་གནས་བླང་བར་བྱའོ། །གཉེན་པོ་འབྲིང་དང་ལྡན་པ་རྣམས་ཀྱིས་དགེ་
1-2-216a
༄༅། །བསྙེན་བླང་ངོ་། །གཉེན་པོ་རབ་དང་ལྡན་པ་རྣམས་ཀྱིས་ཡ་ཐ་གཉིས་ཡང་དག་པར་བླང་ངོ་། །གང་ཞིག་བསིལ་བར་འདོད་པ་ཡིས། །རང་གི་གཉེན་པོ་ཉིད་དང་སྦྱར། ཁས་བླངས་བཞིན་དུ་རྗེས་སུ་བསྲུང་། །དེ་ནི་རྣམ་དག་ཚུལ་ཁྲིམས་ཡིན། །ཡང་དག་པར་བླངས་པས་མ་ཉམས་པར་འདུལ་བའི་སྡེ་སྣོད་ནས་འབྱུང་བ་བཞིན་དུ་སྤྱོད་པ་ཉན་ཐོས་དང་འཐུན་ལ། རྩི་སྨན་ཆེན་པོས་ཟིན་པར་བྱའོ། །དེ་ལྟར་སྦྱངས་པས་དབང་པོ་ཐ་མ་འབྲིང་དུ་འགྱུར་རོ། །རང་ཉིད་ཐར་བར་འདོད་པས་འབད་ཀྱང་བྱང་ཆུབ་ཐོབ་པར་མི་འགྱུར་བས། སེམས་ཅན་ཐམས་ཅད་དང་ཐུན་མོང་དུ་བྱས་ནས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་བྱའོ། །སེམས་བསྐྱེད་ནས་དེ་དག་གི་བསླབ་བྱ་ལ་ཡང་དག་པར་བསླབ་པར་བྱའོ། །རྩ་བའི་ལྟུང་བ་བརྒྱད་དང་། ཉན་ཐོས་དང་ཐུན་མོང་པ་བཞིའོ། །ཐུན་མོང་མ་ཡིན་པ་བཞི་ཡོད་དོ། །ཀུན་ནས་དཀྲིས་པ་ཆེན་པོས་ཀུན་ནས་བསླང་ཞིང་། བདག་ལ་བསྟོད་ཅིང་གཞན་ལ་སྨོད་པ་དང་། ཆོས་དང་ནོར་གཞན་ལ་མི་སྟེར་བ་དང་། དམ་ཆོས་འདྲར་སྣང་སྟོན་པ་དང་། གཞན་ལ་བརྟེག་ཅིང་འཚོག་པའོ། །དེ་དག་ཀུན་ནས་དཀྲིས་པ་འབྲིང་གིས་བྱས་ན་སྦོམ་པོར་འགྱུར་རོ། །ཀུན་ནས་དཀྲིས་པ་མེད་པར་དེ་དག་བྱས་ན། ཉོན་མོངས་པ་མེད་པར་ཉེས་པར་འགྱུར་རོ། །ཀུན་ནས་དཀྲིས་པ་ཆེན་པོས་དེ་དག་རྒྱུན་མི་
1-2-216b
ཆད་པར་ཀུན་ཏུ་སྤྱོད་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་བྲལ་བའོ། །དེ་གཉིས་གང་ཡང་རུང་བ་གཅིག་དང་ལྡན་པ་ནི་འབྲིང་ངོ་། །རྒྱུན་མི་ཆད་པར་མི་སྤྱོད་ལ། ངོ་ཚ་དང་ལྡན་ཡང་ཁྲེལ་མེད་པ་ནི་ཆུང་པའོ། །ཉེས་པ་དེ་དག་བྱུང་ཡང་ཕྱིར་བཅོས་པས་སོར་ཆུད་དེ། རིན་པོ་ཆེའི་སྐྱོགས་ཞོམ་པ་བཞིན་ནོ། །བདག་ལ་འདོད་པ་ཅུང་ཟད་ཀྱང་མེད་པར་ཕན་སེམས་ཀྱིས་ཀུན་ནས་བླངས་ནས། དེ་དག་བྱས་ཀྱང་ཉེས་པར་མི་འགྱུར་ལ། ཕན་ཡོན་ཆེན་པོ་དང་ལྡན་པར་འགྱུར་ཏེ། དཔེར་ན་སྨན་དང་སྔགས་ཀྱིས་བསད་པའི་དུག་བཞིན་ནོ། །བྱེད་པའི་ལས་ནི་སེམས་ཅན་གྱི་དོན་བྱེད་པ་ཁོ་ནའོ། །འབྲས་བུ་ནི་གནས་སྐབས་ས་བཅུ་འཐོབ་ལ། མཐར་ཐུག་སྐུ་གསུམ་རྫོགས་པར་འགྱུར་རོ། །དེ་དག་ལ་སློབ་པར་འདོད་པས། རྒྱས་པར་བྱང་ཆུབ་སེམས་དཔའ་ལམ་དང་། འབྲས་བུ་དང་བཅས་པར་སྟོན་པའི་གཞུང་ལས་ཤེས་པར་བྱའོ། །དེ་ཡང་དོན་བྱེད་པའི་བྱང་ཆུབ་སེམས་དཔའ་དང་། དོན་བྱ་རྒྱུའི་བྱང་ཆུབ་སེམས་དཔའ་དང་། ཐོབ་བྱ་བླ་ན་མེད་པའི་བྱང་ཆུབ་དང་གསུམ་རྟོགས་པ་ནི། དམིགས་པ་དང་བཅས་པར་འགྱུར་བས། དེ་དག་མི་དམིགས་པར་བྱ་བའི་ཕྱིར། ཉེ་བའི་ལམ་རྡོ་རྗེ་ཐེག་པར་འཇུག་པར་བྱ་སྟེ། སྡོམ་པ་གསུམ་ལ་རིམ་གྱིས་འཇུག་གོ །སྤྱིར་ནི་ཁ་ཅིག་འཇིག་རྟེན་ཆོས་མཆོག་མན་ཆད་དུ། ཕ་རོལ་ཕྱིན་པའི་ཐེག་པ་དང་། 
1-2-217a
༄༅། །ཐུན་མོང་དུ་སེམས་བསྐྱེད་ནས། ས་དང་པོ་ཡན་ཆད་རྡོ་རྗེ་ཐེག་པ་ཉིད་ལ་བརྟེན་ནོ། །དེ་བཞིན་དུ་ཁ་ཅིག་གཉིས་པ་ཡན་ཆད་དོ། ཁ་ཅིག་དྲུག་པ་ཡན་ཆད་དོ། ཁ་ཅིག་བཅུ་པ་མན་ཆད་ཐུན་མོང་དུ་སེམས་བསྐྱེད་ནས། ཕྱོགས་བཅུའི་སངས་རྒྱས་རྣམས་ཀྱིས་སངས་རྒྱས་ཀྱི་ས་གཉིས་སུ་དབང་བསྐུར་ནས་སངས་རྒྱའོ། །ཁ་ཅིག་ཐོག་མ་ཉིད་ནས་སྡོམ་པ་གསུམ་ལ་རིམ་གྱིས་བསླབས་ནས། རྡོ་རྗེ་ཐེག་པ་ལ་བརྟེན་ནས་ཚེ་འདི་ཉིད་ལ་སངས་རྒྱའོ། །འདིར་ལམ་དེ་ཉིད་ཉེ་བར་བཟུང་བར་བྱའོ། །དེ་ལ་གཉིས་ཏེ། རྒྱུད་མ་སྨིན་པ་སྨིན་པར་བྱེད་པའི་དབང་བཞི། སྨིན་པ་གྲོལ་བར་བྱེད་པའི་ལམ་བསྐྱེད་རྫོགས་གཉིས་སོ༑ ༑དེ་ལ་གཉིས་ཏེ། རླུང་ལ་བརྟེན་ཏེ་རྣམ་པར་རྟོག་པ་འགོག་པར་བྱེད་པ་དང་། སྒྱུ་ལུས་ལྷའི་རྣམ་པར་བསྒོམ་པའོ། །སྤྱིར་འཁོར་བ་བསྐྱེད་པར་བྱེད་པའི་རྒྱུ་བདག་ཏུ་འཛིན་པའི་རྣམ་པར་རྟོག་པ་ཡིན་ལ། དེའི་རྟེན་རླུང་ཡིན་པས་རླུང་བཀག་ན་དེ་ལ་བརྟེན་པའི་རྣམ་པར་རྟོག་པ་འགོག་པ་ནི། རྟེན་བཀག་པས་བརྟེན་པ་འགོག་པའི་ཚུལ་ཡིན་ཏེ། དཔེར་ན་ཤིང་རྟའི་འཁོར་ལོ་ཉམས་ན་ལུས་གཡོ་བར་མི་ནུས་པ་བཞིན་ནོ། །དེ་ལ་གསུམ་ཏེ། སྔོན་དུ་འགྲོ་བ་སྦྱོར་བའི་གདམས་ངག་དང་། ཉེ་བར་བསྒྲུབ་པ་དངོས་གཞིའི་གདམས་ངག་དང་། བསླབ་བྱ་རྗེས་ཀྱི་གདམས་ངག་གོ །དང་པོ་ལ་གསུམ་སྟེ། ཐིག་ལེ་ལ་བརྟེན་པ་
1-2-217b
དང་༑ རྩ་ལ་བརྟེན་པ་དང་། རླུང་ལ་བརྟེན་པའོ། །དང་པོ་ནི། གནས་དབེན་པ་ཡིད་དང་འཐད་པའི་སར་བདེ་བའི་སྟན་ལ་འདུག་སྟེ། རྐང་པ་རྡོ་རྗེ་སྐྱིལ་ཀྲུང་བཅས། ལག་པ་མཉམ་བཞག་གི་ཕྱག་རྒྱ་བཅས། སྒལ་ཚིགས་དྲང་པོར་བསྲང་། ལྕེ་ཡ་རྐན་ལ་སྦྱར། མིག་སྣ་རྩེ་ལ་བལྟས་ལ། སྨིན་ཕྲག་ཏུ་རུས་པ་གྲུ་གསུམ་གྱི་ནང་དུ་ཐིག་ལེ་དཀར་ལ་འཚེར་བ། སྣུམ་ལ་འདྲིལ་བ། སྲན་མ་ཙམ་གཅིག་བསྒོམ། རེས་འགའ་སྣ་རྩེར་བསྒོམ། རེས་འགའ་ཚངས་བུག་ནས་རྩ་དབུ་མར་ཞུགས། རྡོ་རྗེའི་རྩེ་མོར་བསྒོམ། ཡང་ཡར་ལ་གྱེན་ལ་སྐར་མདའ་ལྟར་འཕངས་ལ། སྔ་མ་བཞིན་དུ་བསྒོམ་མོ། །གཉིས་པ་རྩ་ལ་བརྟེན་པ་ལ། དབྱིབས་དང་། ཁ་དོག་ལ་སེམས་བཟུང་སྟེ། གཡས་རོ་མ། གཡོན་རྐྱང་མ། དབུས་ན་ཨ་བ་དྷཱུ་ཏི་ལྗོན་ཤིང་གི་སྡོང་པོ་ལྟར་གནས་ཏེ། རྩ་བྲན་རྣམས་ཡལ་ག་གྱེས་པ་ལྟར་གནས་སོ། །དབྱིབས་བཟླུམ་ཞིང་རིང་བའམ༑ སྙུག་མའམ། གྲོ་སོགས་ལྟར་གནས་སོ། ཁ་དོག་ནི། གཡས་རོ་མ་དབུགས་རྔུབས་པ་དང་བསྟུན་ཏེ་དམར་པོར་བསྒོམ། གཡོན་རྐྱང་མ་དབུགས་དབྱུང་བ་དང་བསྟུན་ནས་དཀར་པོར་བསྒོམ། རྩ་དབུ་མ་ནི་ཆོས་བཞི་ལྡན་ཏེ། པད་མའི་རྣམ་པ་ལྟར་ཕྲ་བ། ཏིལ་གྱི་མར་མེ་ལྟར་གསལ་བ། ཆུ་ཤིང་གི་སྡོང་པོ་ལྟར་དྲང་བ། ལི་ཁྲི་ལྟར་དམར་བ། དབུགས་གནས་པ་དང་བསྟུན་ཏེ། བཞི་ལྡན་དུ་བསྒོམ་མོ། །གསུམ་
1-2-218a
༄༅། །པ་རླུང་ལ་བརྟེན་པ་ནི། ཐོག་མར་སྣ་སྒོ་ནས་སོར་བཞི་ཙམ་ནས་རླུང་རྔུབས་ནས། རྩ་རོ་རྐྱང་གཉིས་ཀ་ནས་ཞུགས་ནས་ལྟེ་བ་ནས་སོར་བཞིར་དབུ་མའི་ནང་དུ་ཞུགས་ནས། རྩ་ནང་གི་མི་གཙང་བ་ཐམས་ཅད་རླུང་གིས་དེད་ནས་བསྙིལ་བར་བསམ་མོ། །རླུང་མ་ཐུབ་ན་ཚངས་བུག་ནས་ཐོན་པར་བསམ་ལ་བཏང་ངོ་། །རྣམ་པར་རྟོག་པ་རླུང་གི་རྗེས་སུ་འགྲོ་བ་ལ་བསླབ་པར་བྱའོ། །དེ་ནས་དངོས་གཞི་ལ་འཇུག་སྟེ། ཙཎྜ་ལི་སྤར་བ་དང་། བོགས་དབྱུང་བ་དང་། རྟགས་དང་། ཏིང་ངེ་འཛིན་ངོས་བཟུང་བ་དང་། ཞར་ལ་བྱུང་བའི་དོན་བསྟན་པའོ། །དེ་ལས་དང་པོ་ལུས་ཀྱི་སྤྱོད་ལམ་སྔ་མ་བཞིན་དུ་བྱས་ལ། ཆོས་ཐམས་ཅད་སྒྱུ་མ་ལྟ་བུར་ཡིད་ཆེས་པར་བྱས་ཏེ། རྩ་དབུ་མ་རྩ་གསུམ་འདུས་པའི་སར་ཨ་ཤད་དམར་པོ་གཅིག་བསམ་ལ། སྔ་མ་བཞིན་དུ་རླུང་མནན་པས། མེ་ཁ་དོག་དམར་བ། རེག་བྱ་ཚ་བ། རྣོ་ལ་མྱུར་བ་སོར་བཞི་ཙམ་པ་བསྐྱེད་དེ། དེ་ལ་སེམས་གཏད་ལ་མ་ཡེངས་པར་བསྒོམ་མོ། །ཐུན་བཞིའི་ངེས་པ་བཅས་ལ། འབད་རྩོལ་དྲག་པོས་སྒོམས་པས་དྲོད་དང་བདེ་བ་མི་རྟོག་པ་སྐྱེའོ། །གལ་ཏེ་དྲོད་མ་སྐྱེས་ན་བོགས་འདོན་ཏེ། ལུས་ལ་བཀུ་མཉེ་བྱ། ལུས་སྦྱོང་བྱ། ཟས་བཅུད་ཅན་བསྟེན། ལུས་ཙོག་པུར་གནད་ལ་ཕབ་ལ་རྐང་པ་གཡོན་པའི་བོལ་གོང་དུ་གཡས་པའི་བྲང་བ་བཞག །ལག་པ་གཉིས་པུས་མོ་ལ་འཇུས་
1-2-218b
ནས་སྟེང་རླུང་མནན་པས། ལྟེ་བའི་མེ་བསྐྱེད་ནས་མགྲིན་པར་ཕྱིན། འོག་རླུང་ཐེན་པས་རྐང་ཐིལ་གཉིས་ཀྱི་རཾ་དམར་ནག་ལས་མེ་འབར་བས་དམར་པོར་བསྐྱེད་དོ། །ལོང་བུའི་རྩ་ནང་ནས་ཞུགས་ནས་རླའི་རྩ་བོ་ཆེའི་ནང་དུ་ཞུགས་ཏེ་གསང་གསུམ་འཇོམ། རླུང་ཁ་སྦྱོར་དུ་གནས་པས་མེ་དེས་རྩ་བྲན་ཐམས་ཅད་མེས་དམར་ཅིག་ཅིག་སོང་བར་བསམ་ལ་བསྒོམ། དེ་ལ་ཡིད་སྐྱོ་ན་ལུས་ཁོང་སྟོང་དུ་དམིགས་ལ་རླུང་ཁ་སྦྱར་བས་ལུས་ཀྱི་ནང་ཐམས་ཅད་མེ་དམར་སྐྱ་གཡོ་ཞིང་ཤིན་ཏུ་དྲག་པ་ལ་སེམས་གཏད་ལ་བསྒོམ། དེ་གཉིས་རེས་འཇོག་ཏུ་བསྒོམས་པས་ཞག་བདུན་ན་དྲོད་རྟགས་མི་འབྱུང་མི་སྲིད་དོ། །དྲོད་སྐྱེས་ཀྱང་བདེ་བ་མ་སྐྱེས་ན་ལུས་ཙོག་པུར་བྱས། རྟིང་པ་གཉིས་སྤྲད་ལ་རྡོ་རྗེ་གོ་ཆོག་གི་ཕྱག་རྒྱས་པུས་མོ་གཉིས་ལ་འཁྱུད། རྡོ་རྗེའི་བུ་ག་ཕཊ་ཀྱིས་བཀག་ལ་རླུང་ཁ་སྦྱོར་དྲག་ཏུ་མནན་པས། ལྟེ་བའི་ཨ་ལས་ཧཱུྃ་དཀར་པོ་གཅིག་ཆད་ནས། རླུང་གིས་བཏེགས་པའི་ཚུལ་གྱིས་རྩ་དབུ་མའི་ནང་ན་ཡར་སྐྱ་ཧྲི་ལི་ལི་སོང་ནས་སྤྱི་བོའི་ཧཾ་ལ་ཕོག །ཧཾ་ཡང་ཐིག་ལེ་ཧཱུཾ་གི་རྣམ་པ་ཅན་མར་བྱུང་ནས་ཨ་ལ་ཐིམ། དེ་བཞིན་དུ་མ་ཡེངས་པར་བསྒོམས་པས་བདེ་བ་སྐྱེའོ། །བདེ་བ་ཆེས་ན་ཐིག་ལེ་མི་ཐུབ་པ་སྙམ་བྱེད་ན། ཧཱུྃ་དེ་སྤྱི་བོ་ཚངས་པའི་བུ་ག་ནས་སྒྲ་དང་བཅས་པ་ནམ་མཁའ་ལ་ཡར་ནས། ཚངས་བུག་ལ་རྡོ་རྗེ་རྒྱ་གྲམ་གྱིས་བཀག་པའི་སྟེང་དུ་
1-2-219a
༄༅། །ཧཱུཾ་དེ་གནས་པར་བསམ། བདེ་བ་ཆུང་ན་ཧཱུྃ་ཕབ་ལ་སྔ་མ་བཞིན་དུ་བསྒོམ། མན་ངག་ལ་བརྟེན་ནས་ཐིག་ལེ་ལུས་ལ་བགྲམ། དགའ་བདེ་ཁྱད་པར་ཅན་སྐྱེའོ། །དགའ་བས་སེམས་ལ་ཕན་འདོགས༑ བདེ་བས་ལུས་སེམས་གཉིས་ཀ་ལ་ཕན་འདོགས་ཏེ། ལུས་སེམས་ཚིམ་པར་བྱེད་དོ། །དེ་ལ་བརྟེན་ནས་སེམས་མི་གཡོ་བར་གནས་པ་ཉིད་ལ་མི་རྟོག་པ་སྐྱེ་ཞེས་བྱའོ། །དམིགས་པ་ལ་མི་རྟོག་པའི་ཕྱིར་རོ། །གསུམ་པ་ནི་དེ་ལ་རྟགས་ལྔ་དང་རྟགས་ཀྱི་རྟགས་ཆེན་ལྔ་འབྱུང་ངོ་། །དང་པོ་ནི། དུ་བ་དང་། སྨིག་སྒྱུ་དང་། སྲིན་བུ་མེ་ཁྱེར་དང་། མར་མེ་དང་། ནམ་མཁའ་སྤྲིན་མེད་པ་ལྟ་བུའོ། །གཉིས་པ་ནི། མུན་ནག་དང་། འཇའ་ཚོན་དང་། གློག་དང་། ཉི་མའི་འོད་ཟེར་དང་། ཟླ་བའི་འོད་ཟེར་ལྟ་བུ་འབྱུང་ངོ་། །མཐོང་སྣང་དང་རྨི་ལམ་ལ་སོགས་པ་ཅི་རིགས་པར་འབྱུང་ངོ་། །ཉམས་ཐམས་ཅད་བྱུང་རྒྱལ་དུ་བསྐྱང་ངོ་༑ ༑ཏིང་ངེ་འཛིན་ངོས་བཟུང་བ་ནི། དམིགས་པ་ལ་རྩེ་གཅིག་ཏུ་གནས་པ་སྟེ། རྒྱས་པར་བྱེད་ན་དཔག་ཏུ་མེད་པ་ཡོད་ཀྱང་། འདིར་ལྔར་དབྱེ་སྟེ། ཉོན་མོངས་པ་རང་བྱུང་གི་ཏིང་ངེ་འཛིན་ལ་སོགས་པའོ། །དེ་ནི་ཡུལ་དང་རྐྱེན་ལ་མི་ལྟོས་པར་སྐྱེའོ། །རྣམ་པར་རྟོག་པ་རང་བྱུང་གི་ཏིང་ངེ་འཛིན་ནི། རྣམ་པར་རྟོག་པ་སྣ་ཚོགས་སུ་སྐྱེས་པའི་གཉེན་པོའོ། །རྟེན་འབྲེལ་གཞི་རང་བྱུང་གི་ཏིང་ངེ་འཛིན་ནི་འདྲེས་པ་སྟེ། 
1-2-219b
གསལ་བ་ཡང་དག་ཀྱང་མ་ཡིན་ལ། མི་གསལ་བ་ཡང་དག་ཀྱང་མ་ཡིན་ཏེ། ཤེས་པ་མེར་མེར་གནས་པའོ། །གསལ་ཞིང་ཡངས་པ་རང་བྱུང་གི་ཡེ་ཤེས་ཆེན་པོའི་ཏིང་ངེ་འཛིན་ནི་ཡོན་ཏན་གསུམ་ཐོབ་པ་དང་། གསལ་སྟོང་ཆེན་པོ་ལ་བློ་འཇོག་པའོ། །མ་འདྲེས་པར་ཡོངས་སུ་རྫོགས་པའི་ཏིང་ངེ་འཛིན་ནི་རིགས་དྲུག་སོ་སོའི་སྐད་ཤེས། དེའི་སྐད་དུ་ཆོས་སྟོན་པའོ། །ཨཱ་ལྀ་ཀཱ་ལྀ་དབང་ཐོབ། དེ་ལས་བྱུང་བའི་ཚིག་གི་མཆོག་གྲུབ་སོ་སོ་ཡང་དག་པར་རིག་པ་བཞི་ལ་དབང་ཐོབ། ཚངས་པའི་དབྱངས་སུ་འགྱུར་བ་ལ་སོགས་པའི་ཡོན་ཏན་རྒྱུད་ལ་འཆར་རོ། །གཞན་ཡང་མི་རྟོག་པ་རྒྱུད་ལ་སྐྱེས་པ་ཉིད་ལ་བསམ་གཏན་གྱི་སེམས་ཐོབ་ཞེས་བྱ་སྟེ། བསམ་གཏན་གྱི་ཡན་ལག་དང་ལྡན་པའི་ཕྱིར་རོ། །སྐུའི་སྒོ་དགུ་དགག་པ་ལ་སོགས་པ་དང་། དེ་དག་བསྟན་པའི་གང་ཟག་ལ་ཕྱི་ནང་སྤྱོད་པ་མི་འབྱུང་ཞིང་ཉོན་མོངས་པ་མངོན་གྱུར་མགོ་ནོན་པའི་ཚུལ་གྱིས་འགགས་ནས་ལྔ་མངོན་པར་ཤེས་པ་དང་། འབྲས་བུ་སྲིད་པའི་རྩེ་མོའི་འགྲོ་བའི་ཞི་གནས་འཐོབ་པོ། །དེ་ཡང་འབྲས་བུ་ཆུང་པས་འཛད་པར་འགྱུར་བའི་ཕྱིར་དང་། གཏེར་ཆེན་པོར་འགྱུར་བའི་ལྷག་མཐོང་དང་ལྡན་པར་ཉམས་སུ་བླངས་པས། འཇིག་རྟེན་ལས་འདས་པའི་ལམ་ཡོངས་སུ་རྫོགས་པར་འགྱུར་རོ། །ཞི་གནས་དང་ལྷག་མཐོང་ཁྱད་པར་ཅན་དེ་ཉིད་བརྟན་པར་འགྱུར་བས། རྩ་
1-2-220a
༄༅། །དབུ་མར་རླུང་ཚུད་དེ་འཇིག་རྟེན་ལས་འདས་པའི་ཡེ་ཤེས་རྒྱུད་ལ་སྐྱེ་བར་འགྱུར་རོ། །རྩ་དབུ་མ་ལ་རྩ་མདུད་པ་སུམ་ཅུ་སོ་གཉིས་ཡོད་པ་ལས། དེ་རླུང་གིས་བཤིག་ནས་རྩ་མདུད་དང་པོ་གྲོལ་བས་རབ་དགའི་ཡེ་ཤེས་སྐྱེའི་བར་དུ་ས་བཅུའི་ཡོན་ཏན་སྦྱོར་བ་ལ་མགོ་རྩོམ་པ་དང་། དངོས་གཞི་ལ་ལོངས་སྤྱོད་པ་དང་། འཇུག་པ་ཡོངས་སུ་རྫོགས་ཤིང་ཐིམ་པ་ཞེས་བྱ་བའི་རྩ་མདུད་གསུམ་གྲོལ་བས་ས་རེ་རེའི་རྟོགས་པ་སྐྱེའོ། །མདུད་པ་ལྷག་མ་གྲོལ་བས་སངས་རྒྱས་ཀྱི་སར་ཡོངས་སུ་རྫོགས་པར་འགྱུར་རོ། །དེ་བཞིན་གཤེགས་པ་རྣམས་ནི་རྩ་མདུད་མེད་པར་དྲང་པོར་གནས་པ་ཡིན་ཞེས་སོ། །ཞར་ལ་བྱུང་བའི་དོན་བསྟན་པ་ལ། སེམས་ཀྱི་འཕོ་བ་གྲོང་དུ་འཇུག་པ་ལས་ནི། རྩ་རླུང་སྦྱངས་པའི་ཡོན་ཏན་ནོ། །དང་པོ་གང་ཡང་རུང་བའི་རོ་ལ་སྦྱོང་ངོ་། །དེ་ནས་རྒྱལ་པོ་ལ་སོགས་པའི་རོ་རྨ་མེད་པ། མ་རུལ་བ། རིམས་ནད་དང་། ཡུན་རིང་ན་བ་དང་། ལྐུགས་པ་ལ་སོགས་པ་ཤི་བ་མ་ཡིན་པ་བླངས་ལ་དྲི་ཆུས་ཁྲུས་བྱས། གུ་གུལ་གྱི་དུད་པས་བདུག །དྲི་བཟང་པོས་བྱུག་པ་བྱས་ལ། དཀྱིལ་འཁོར་རམ་མཎྜལ་གྱི་སྟེང་དུ་བཞག །ལྷར་བསྐྱེད། གནས་གསུམ་བསྲུང་། ནུབ་དང་པོ་བསྲུང་བའི་འཁོར་ལོ་བརྟན་པོར་བསྒོམ། ཞག་གཉིས་པ་ལ་རྟེན་དེ་གནས་དབེན་པར་བཞག་ལ། བླ་མ་ཡི་དམ་མཁའ་འགྲོའི་ཚོགས་ལ་ཚོགས་འཁོར་གྱིས་
1-2-220b
མཉེས་པར་བྱ། ཉིན་ཞག་གསུམ་ལ་རང་གི་རླུང་གི་ཤུགས་དང་། ཏིང་ངེ་འཛིན་གྱི་ཤུགས་བརྟགས་ལ། རླུང་ཤུགས་ཤིན་ཏུ་ཆེ་ན་མིག་གིས་མཐོང་བའི་སར་བཞག་པས་ཆོག་ལ། རླུང་ཤུགས་ཆུང་ན་རོ་དང་ཁ་སྤྱད་ལ། རས་བཤགས་ཀྱིས་བསྡམ། ཕྱིའི་སྒོ་ཐམས་ཅད་ཡི་གེས་དགག །སྣ་སྒོ་གཉིས་སྟོང་པར་བཞག་ལ་སྔར་སྦྱངས་པའི་རླུང་གིས། རང་གི་སྙིང་ཁ་ནས་ཧཱུྃ་བྱུང་སྟེ་སྣ་བུག་གཡས་ནས་བྱུང་། རྟེན་དེའི་སྣ་སྒོ་གཡོན་ནས་ཞུགས་ནས་སྙིང་གར་བཞག་ལ། སྲོག་གི་རླུང་ཅི་བདེ་བར་ཡོང་དུ་གཞུག །དེ་བཞིན་དུ་ཡང་དང་ཡང་དུ་བྱས་པས། རྟེན་དེའི་སྙིང་གར་དྲོད་འབྱུང་པ་དང་། སྤྱི་བོར་དྲོད་འབྱུང་པ་དང་། ལུས་ཐམས་ཅད་དྲོད་ཀྱིས་ཁྱབ་པ་དང་། མིག་འབྱེད་འཛུམ་དང་། སྨྲ་བ་ལ་སོགས་འབྱུང་སྟེ། དེ་ཙམ་ན་སེམས་རྩེ་གཅིག་གི་རྟེན་གཉིས་ཡོངས་སུ་འཛིན་པའི་དུས་ཞེས་བྱ་སྟེ། དེ་ནས་དྲག་པོར་བྱེད། ཧི་ཀ་ཉི་ཤུ་རྩ་གཅིག་གིས་མགྲིན་པའི་བར་དུ་དྲངས་ལ། རང་གི་སྣ་གཡས་ནས་དེའི་སྣ་གཡོན་དུ་ཞུགས་ཏེ་སྙིང་གར་བཞག །དབུགས་ཚུར་མི་དྲང་བར་རྟེན་དེ་བླངས་ལ་རང་གི་རྟེན་དེ་དོར་བར་བྱའོ། །རྟེན་རྙིང་པ་ལ་དྲིན་ལན་གྱི་ཚུལ་གྱིས་གཤིན་པོའི་ཆོ་ག་བྱའོ། །རྟེན་གསར་པ་དེས་སེམས་ཅན་གྱི་དོན་མ་ལུས་པ་བྱའོ། །འཆི་བ་མེད་པའི་གདམས་ངག་གོ །ཞར་ལས་བྱུང་བ་གཉིས་པ་སྦ་བ་སྦུབས་སུ་ནུབ་པར་འགྱུར་བའི་གདམས་ངག་
1-2-221a
༄༅། །ནི། རླུང་ཚད་དུ་སྦྱངས་ལ་ལུས་ཙོག་བུའམ། བསམ་གཏན་གྱི་ཡན་ལག་དང་ལྡན་པར་བྱས་ལ། ལག་པ་གཡས་པ་ཉི་མ། གཡོན་པ་ཟླ་བར་བསྒོམས་ལ་པུས་མོ་གཉིས་ལ་དགབ། ལུས་པོ་སྲང་། མས་རླུང་འཐེན། ངག་ཏུ་ཧཱུྃ་རིང་ཐུང་མདུན་དུ་དགུ། གཡས་དང་གཡོན་དུ་གསུམ་གསུམ་བུད་པ་གསུམ་གསུམ་བྱ། དེ་ནས་སྐྱར་མ་བྱས་ཏེ་ཞག་བདུན་ན་ལྦ་བ་སྦུབས་སུ་ནུབ་པར་འགྱུར་རོ། །རྗེས་ཀྱི་བསླབ་བྱ་ལ་གཉིས་ཏེ། བསླབ་བྱ་དམ། ཚིག་གི་ཚུལ་གྱིས་སྤྱོད་ལམ་བསྟན་པ་དང་། འཁྲུལ་སྣང་གེགས་ཀྱི་རྟོག་པ་བསལ་བའོ། །དང་པོ་ལ་གཉིས་ཏེ། ཟས་ཀྱི་སྤྱོད་ལམ་དང་། ལུས་ངག་ཡིད་གསུམ་གྱི་སྤྱོད་ལམ་མོ༑ ༑དེ་དག་སྤང་བར་བྱ་བ་དང་བསྟེན་པར་བྱ་བ་གཉིས་གཉིས་ཀྱིས་བསྟན་ཏོ། །སྤང་བར་བྱ་བའི་ཁ་ཟས་ནི། ཤ་རུལ་སུངས་དང་། ཆང་ཙག་སྒྱུར་དང་། རི་སྒོག་དང་། ལན་ཚྭ་ཧ་ཅང་ཆེས་པ་དང་། དེ་ལ་སོགས་པ་རྩུབ་པར་འགྱུར་བའི་ཁ་ཟས་རྣམས་སྤང་ངོ་། །བསྟེན་པར་བྱ་བའི་ཁ་ཟས་ནི། ཁམས་དང་འཕྲོད་པའི་ཁ་ཟས་བཟང་པོ་བསྟེན། ཨ་རུ་ར་འོ་མར་སྤངས་ལ་རྒྱུན་དུ་མུར། ཆུ་ལུད་ཀྱིས་བསྐྱེད་པའི་སྒོག་པ་ཅུང་ཞིག་བསྟེན། ཆུ་དང་འོ་མར་བཙོས་པའི་མར་ནག་འབྲས་བུ་གསུམ་དང་སྦྲང་རྩིའོ། །ལུས་ཀྱིས་སྤྱོད་ལམ་སྤང་བར་བྱ་བ་ནི། ལུས་ངལ་དུབ་དྲག་པོ་དང་། མེ་དང་ཉི་མས་ལུས་ཉམས་པ་དང་། མཆི་མ་
1-2-221b
དང་༑ མཆིལ་མ་དང་། རྔུལ་དང་། ཁྲག་དང་ཁ་ཆུ་རྣམས་སྣབས་བཞིན་དུ་མི་དབྱུང་ངོ་། །ཐིག་ལེ་མི་ཟིན་པའི་བུད་མེད་མི་བརྟེན་ནོ། །བསྟེན་པར་བྱ་བ་ནི། རྒྱུན་དུ་བསིལ་བའི་གནས་བསྟེན། མེ་དང་ཉི་མ་ལ་རྡེའུ་ངོ་དྲོས་ཙམ་ལས་མི་སྡད། བཀུ་བྱུགས་ལུས་སྦྱོང་ཅི་རིགས་པ་བྱའོ། །ངག་གི་སྤྱོད་ལམ་སྤང་བར་བྱ་བ་ནི། དུང་འབུད་པ་དང་། སྐད་ཆེན་པོ་འབྱིན་པ་དང་། འཁྲུལ་པའི་གཏམ་ལ་མངོན་པར་དགའ་བའོ། །བསྟེན་པར་བྱ་བ་ནི། སྨྲ་བ་ངག་བཅད་ལ་ཐིག་ལེ་བསྲུང་པ་ལ་སོགས་པའི་སྔགས་བཟླས་སོ། །སེམས་ཀྱི་སྤྱོད་ལམ་སྤང་བར་བྱ་བ་ནི། ཞེ་སྡང་དྲག་པོ་དང་། ཚུལ་བཞིན་མ་ཡིན་པ་ཡིད་ལ་བྱེད་པའོ། །མདོར་ན་ཚངས་པར་སྤྱོད་པ་ཁོ་ན་ལ་གནས་པས་ཏིང་ངེ་འཛིན་མྱུར་དུ་སྐྱེ་བར་འགྱུར་རོ། །ཚུལ་ཁྲིམས་བརྟན་ན་ཏིང་ངེ་འཛིན་ཐོབ། །དེ་ལ་བརྟེན་ནས་ཡེ་ཤེས་རྣམ་པར་དག །ཅེས་གསུངས་པའི་ཕྱིར་རོ། །འཁྲུལ་སྣང་གེགས་ཀྱི་རྟོག་པ་བསལ་བ་ལ་གཉིས་ཏེ། རླུང་གི་སྐྱོན་བསལ་བ་དང་། ཐིག་ལེའི་སྐྱོན་བསལ་བའོ། །དང་པོ་ལ་གསུམ་སྟེ། འབྱུང་པ་རླུང་འཁྲུགས་ཀྱི་སྐྱོན་དང་། དབང་པོ་ལྔའི་སྐྱོན་དང་། རླུང་རེངས་ཁྱད་པར་ཅན་གྱི་སྐྱོན་བསལ་བའོ། །དང་པོ་རླུང་གི་རླུང་འཁྲུགས་ན། ལུས་ན་བ་དང་། སྦྲིད་པ་དང་། འཕར་བ་དང་། སྐད་འདོན་པ་དང་། དྲི་ཆུ་བསྡུམ་པ་དང་། རྒོད་པ་རྣམས་འབྱུང་ངོ་། །ལུས་ན་བ་ལ་གང་
1-2-222a
༄༅། །ན་བའི་སར་རྩ་ཁ་ཕྱེ་ལ་རླུང་ན་བུན་གྱི་ཚུལ་དུ་ཐོན་པར་བསམ་མོ། །དེ་བཞིན་དུ་གང་ན་སར་བཀུ་བྱུགས་བྱ། དེས་ཀྱང་མ་ཞི་ན་རྡོ་གྲང་མོས་དུགས་བྱ། ཆུ་ལྕག་བརྡེག་གོ །ཕོ་བ་ན་ཞིང་གཟེར་ན། ཕོ་བར་ཆུའི་དཀྱིལ་འཁོར་བསམས་ནས། གན་རྐྱལ་དུ་ཉལ་ལ། ཆུ་དེ་བཤང་ལམ་ནས་སྔོ་ནར་རེ་བབ་པར་བསམ། ཕོ་བ་ཤིགས་ཀྱིས་སོང་བར་བསམ་པས་ཕན་ནོ། །སྦྲིད་པ་ལ་སྔར་བཞིན་གང་ན་སར་རྩ་དབྱེ་བ་ལ་སོགས་པ་བྱའོ། །འདར་བ་དང་འཕར་བ་ལ་བླ་མ་སྤྱི་བོར་བསྒོམ། དེས་མ་ཞི་ནས་མཆོད་རྟེན་སྤྱི་བོར་བསྒོམ། དེས་མ་ཞི་ན་ཆུའི་སྟེང་དུ་བསྡད་པར་བསམ་ལ། དེར་བྱིང་ནས་རང་གི་ལུས་ཇེ་བྱིང་ལ་མཐར་སྐུ་རྩེ་ཐུག་པར་བྱིང་བར་བསམ་མོ། །དེས་མ་ཞི་ན་གང་ལ་ཞེན་པ་དེ་སྤངས་ལ་སྣང་བ་སེམས་སུ་ཤེས། སེམས་ཉིད་སྟོང་པར་ཤེས་པས་སེལ་ལོ། །དྲི་ཆུ་བསྡམས་ན་རྡོ་རྗེ་བུམ་པའི་ནང་དུ་རླུང་བཅུག་ལ་རྡོ་རྗེ་བུམ་པའི་ནང་ནས་རླུང་བཏང་ངོ་། །ཡང་རྐང་པ་བརྐྱང་བསྐུམ་དྲག་ཏུ་བྱའོ། །སྨྲ་བ་དང་དགོད་པ་ལ་ལྕེ་ལ་རྡོ་རྗེ་རྒྱ་གྲམ་བསམ་པས་ཕན་ནོ། །འབྱུང་བ་མེའི་སྐྱོན་ནི་སྐད་འགགས་པ་དང་། མགྲིན་པ་སྐམས་པ་དང་། སྐད་མཛེར་བ་དང་། མིག་ཚ་བ་དང་། ཁ་བསྐམས་པ་དང་ལུས་ལ་རྔུལ་འབྱུང་པའོ། །དེ་བསལ་བ་ལ། མེའི་དམིགས་པ་རེ་ཞིག་བཞག་པས་སེལ་ལོ། །དེས་མ་ཕན་ན་ལུས་ཀྱི་ནང་དུ་འབྱུང་བ་
1-2-222b
ཆུའི་རླུང་བཅུག་པས་སེལ་ལོ། །རླུང་གཏོང་ཙམ་ན་སྤྱི་བོ་ནས་འགྲོ་བར་བསམ་མོ། །འབྱུང་བ་ཆུ་འཁྲུགས་པའི་སྐྱོན་ནི་དྲི་ཆུ་འཛག་པ་དང་། ཐིག་ལེ་འཆོར་བ་དང་། སྲིན་བུ་འོང་བ་དང་། ཐུར་སེལ་གྱི་རླུང་མི་ཐུབ་པ་དང་། ཁ་ཆུ་སྣ་ཆུ་མིག་ཆུ་རྣམས་འཛག་པ་འབྱུང་ངོ་། །ཐིག་ལེ་བཟློག་པའི་ཐབས་འོག་ནས་འབྱུང་ངོ་། །ས་འཁྲུག་པའི་སྐྱོན་ལུས་ལྕི་ཞིང་རིས་ནོན་པ་སྙམ་བྱེད་པ་འོང་། ལུས་ནུས་པ་ཆུང་། མི་ཐོག །འགྲོ་མི་ནུས་པ་འབྱུང་ངོ་། །དེ་བསལ་བ་ནི། རླུང་གི་རླུང་བཅུག་ནས་གཏོང་ཙམ་ན་སྤྱི་བོ་ནས་གཏོང་། ཙོག་བུར་ཡུན་རིང་དུ་བསྒོམས་པས་ཁད་ཀྱིས་སེལ་ལོ། །དབང་པོ་ལྔའི་སྐྱོན་བསལ་བ་ནི། མིག་དུ་རྒྱུ་བའི་རླུང་རེངས་ནས་མིག་མི་གསལ་ན་ཤེས་པ་ལྟག་པར་ཐིག་ལེ་ལ་གཏད་ལ་རིམ་གྱིས་རིང་དུ་བཏང་ངོ་། །མིག་ཚག་པོར་སོང་པ་དང་། མཆི་མ་བྱུང་ན་མིག་སྟོང་པར་བསམ་མོ། །ཡང་ན་ཐིག་ལེ་སྲན་མ་ཙམ་ལ་ཤེས་པ་གཏད་དེ་ཕར་ཚུར་བལྟའོ། །དེས་མ་ཕན་ན་ཉལ་ཁར་མིག་ལ་འབྲས་བུ་གསུམ་པའི་ཆུས་བྱུགས། དར་རམ་རས་ཀྱིས་མིག་ལ་བཀབ་བོ། །ཤེས་པ་གཏད་གྲགས་པས་མིག་འབུར་པོར་སོང་པ་སྙམ་བྱེད་པ་དང་། མི་མཐོང་ན་ལྷག་པར་ཐིག་ལེ་ནག་པོ་བསྒོམ། ལྟག་པར་བཀུ་མཉེ་བྱའོ། །རྣ་བར་རྒྱུ་བའི་རླུང་རེངས་ན་རྣ་བ་འོན་པའམ། འུར་འུར་ཟེར་བ་འབྱུང་ངོ་། །དེར་བསལ་བ་ནི་རྣ་བ་སྟོང་པར་བསམ་
1-2-223a
༄༅། །པའམ། ཐིག་ལེ་སྲན་མ་ཙམ་རེ་བསྒོམ་མོ། །དེས་མ་ཕན་ན་སྦུ་གུའི་ནང་ནས་ཚིལ་ཆེན་གྱི་དུད་པས་བདུག །རུས་ཁུ་ལ་སོགས་པའི་བཅུ་ཅན་བཏང་ངོ་། །སྣར་རྒྱུ་བའི་རླུང་རེངས་ན་སྣ་འགགས་པ་དང་དབུགས་མི་ཐོན་ན་སྣར་སྒ་ཚ་ཕྱེ་མ་བཏབ་ལ་མཉེ་ཞིང་དབུགས་ཕྱིར་བཏང་ངོ་། །ལྕེ་ལ་རབ་ཏུ་རྒྱུ་བའི་རླུང་རེངས་ན་ལྕེ་ལྐུགས་པར་འགྱུར་རོ། །སྟན་ནམ། ཕྱར་བའི་ཁར་བསྡད་ལ་གཞན་གྱིས་ཟུར་ནས་བཏེག་ན། སྟེང་དུ་བསྐྱུར་འོག་ཏུ་བསྐྱུར་ལ་བྱའོ། །ཡང་གཞན་གྱིས་རྣ་བ་ནས་བསྡམས་ལ་བསྒྱུར་རོ། །རླུང་གིས་ལུས་སྐྲངས་ཏེ་ཐམས་ཅད་རྒྱས་པར་སྐྲངས་ནས་ན་ན། དྲི་ཆུ་དྲོན་མོས་ལུས་ཐམས་ཅད་བཀྲུ། དེ་ནས་ཆང་གིས་བཀྲུ། དེ་ནས་མར་ནག་པོ་ལོ་ལོན་པའམ། ཚིལ་ཆེན་གྱིས་བྱུགས་ལ། རྡོས་ལུས་ཐམས་ཅད་ཁྱབ་པར་བཅག་གོ ། ལུས་ཁོལ་བུར་ན་ན་ཉམས་དང་སྦྱར་ལ་བཅག་གོ །ལུས་ལ་ཟ་ཕྲུག་ལ་སོགས་པ་བྱུང་ན་དྲི་ཆུས་ལུས་བཀྲུས་པས་ཕན་ནོ། །དེས་མ་ཞི་ན་གཡེར་མ་དང་མར་ནག་བསྐོལ་བས་བྱུགས་ལ་མེའམ་ཉི་མ་ལ་བདུགས་པས་ཕན་ནོ། །མགོ་བོ་ན་བ་ལ་སྟོང་པར་བསམས་ཏེ། ཡི་གེ་ཨ་ཧཾ་གཉིས་འཁོར་བ་ལ་ཤེས་པ་གཏད་པའམ། འོད་ཟེར་དམར་སེར་གྱིས་གང་བར་བསམ་མོ། །མགྲིན་པ་ན་བ་ལ་སྐེ་བཀུག་ལ་ཕར་བཅུ་ཚུར་བཅུ་བྱས་པས་ཕན་ནོ། །ལྐོག་འབྲས་ལ་སོགས་པར་གྱུར་ན། མགོ་
1-2-223b
ཕྱོགས་བཞིར་བསྐྱོད། སྒྲུངས་པའི་སར་སོར་མོས་སྦྱངས། ཤུགས་བསྐྱེད། དེ་གཉིས་ཁ་སྒྲ་བཅས་སུ་བཏང་ངོ་། །ཡན་ལག་ལ་སོགས་འཁུམས་པར་གྱུར་ན། ལུས་སྦྱོང་དང་བཀུ་བྱུགས་བྱ། ཆུར་ཞུགས་ལ་ཐོན་མ་ཐག་ཏུ་རླུང་ཁ་སྦྱོར་དྲག་ཏུ་བསྒོམས་ན་ཕན་ནོ། །རོ་སྟོད་ན་ན། དེ་ཉིད་སྟོང་དྲ་མིས་གང་བར་བསྒོམ་མོ། །བཤང་ལམ་བསྡམས་ན་འོག་རླུང་བསྡམ། ལུས་ཀྱི་འཁྲུལ་འཁོར་རྐང་པ་བརྐྱང་བསྐུམ་དང་། གྱེན་ལ་ཡར་མཆོང་བ་དང་། ཐུར་ལ་མར་མཆོང་བ་བྱས་པས་སེལ་ལོ། །བཤང་ལམ་ཚ་ཞིང་ཁྲག་འབབ་ན། རོ་སྨད་ཆུར་ཅུང་ཞིག་གཞུག་འོག་རླུང་ཡན་དུ་གཞུག་གོ །དེ་དག་གིས་དབང་པོ་ལྔའི་སྐྱོན་བསལ་བའོ། །ཁྱད་པར་གྱི་རླུང་རེངས་ལ་གཉིས་ལས། དང་པོ་ནི། སྟེང་རླུང་སྲོག་གི་རླུང་དང་འོག་ཏུ་བླུགས་ན་མྱུར་དུ་བསལ་བ་གལ་ཆེ་སྟེ། ལྟེ་བ་མན་ཆད་ཀྱི་སྲོག་གི་རླུང་གིས་དབང་བྱས་ནས་གཟེར། དྲི་མ་རྣམས་མི་ཐོན། རླུང་འབྱིན་མི་ནུས། རྩ་བསྡུད། ཉིན་ཞག་གཅིག་འདས་ན་ཚེའི་དུས་བྱེད་པས་ཤིན་ཏུ་སྐྱོན་ཆེའོ། །དེ་བསལ་བ་ནི། ལྟེ་བའི་འོག་ཏུ་རས་སམ་དར་ལྷོ་སྙམ་པ་ཙམ་བཅུག་ལ་རས་ཀྱི་ཤགས་པས་རན་ཙམ་བསྡམས་ལ་གྲོགས་མེད་ན་རང་གིས་རྐང་པ་བརྐྱང་བསྐུམ་བྱའོ། །གྲོགས་ཡོད་ན་སྔ་མ་བཞིན་དུ་བྱས་ཏེ། རྐེད་པ་ནས་བཟུང་ལ་མགོ་ཐུར་ལ་དཔྱངས་ཏེ། དང་པོ་རྐང་མཐིལ་གཉིས་བརྡུང་། དེ་ནས་སྒལ་
1-2-224a
༄༅། །ཚིགས་ཟད་སོའི་བར་དུ་བརྡུང་། རྐེད་པ་ཅུང་ཞིག་གཅུ། ལུས་ཐམས་ཅད་གཅུ་ཞིང་སྤྲུག །དེ་ནས་དལ་བུས་ཉལ་ལ། ཡན་ལག་ཐམས་ཅད་རིམ་གྱིས་མཉེས་པས་འཕྲལ་དུ་སྐྱོན་ལས་གྲོལ་ཏེ། ཉིན་ཞག་གཅིག་འདས་ན་སྔ་མའི་ཚུལ་གྱིས་བདེའོ། །གཉིས་པ་འོག་རླུང་ཐམས་ཅད་སྲོག་གི་རླུང་གིས་དབང་དུ་བྱས་ཏེ། སྟོད་དུ་ལྷགས་ན་མགྲིན་པའི་རྩ་མདུད་དོགས་པས་ཆེར་ཧགས་ཏེ་རོ་སྟོད་གཟེར། དབུགས་ཆ་ཕྱིར་མི་ཐོན། རྩ་རིམ་གྱིས་བསྡུད། ཞག་གཅིག་འདས་ན་ཚེའི་དུས་བྱེད་པས་སྐྱོན་ཤིན་ཏུ་ཆེའོ། །དེ་ཞི་བར་བྱེད་པ་ནི་ནུ་མ་གཉིས་ཀྱི་འོག་ཏུ་རས་སམ་དར་གྱི་ཕོན་ལྷོ་སྙམ་པ་ཙམ་རེ་རེ་བཅུག་ལ་རས་ཀྱི་ཤགས་མས་རན་ཙམ་དུ་བསྡམ། དལ་བུས་བླངས་ལ་རྐང་པ་ས་ལ་མ་རེག་པར་ཏོང་རུས་ནས་བཟུང་སྟེ། ཚིགས་པ་ཟད་པའི་བར་དུ་རིམ་གྱིས་བརྡུང་། ཅུང་ཞིག་སྤྲུག །ཅུང་ཞིག་མཉེ་ཞིང་ཉལ་ལོ། །ཉིན་ཞག་གཅིག་འདས་པ་དང་སྐྱོན་ལས་གྲོལ་ཏེ། ཤེས་པ་ཅུང་ཟད་ཙམ་མི་གསལ་བ་འབྱུང་ལ། རིག་པ་སེམས་ཀྱི་རང་སོ་བཟུང་ན་ཏིང་ངེ་འཛིན་མཆོག་ཏུ་འགྱུར་རོ། །ཐིག་ལེ་མི་ཉམས་པར་བསྲུང་བ་དང་། ཉམས་ན་བཅོས་པའི་ཐབས་བསྟན་པ་ལ། ཇི་ལྟར་མི་ཉམས་པར་བསྲུང་ཞེ་ན། རྫས་དང་སྔགས་དང་ཏིང་ངེ་འཛིན་གྱིས་བྱང་ཆུབ་ཀྱི་སེམས་ལུས་ལས་མི་འདའོ། །རྫས་སུ་གྱུར་པ་གུ་གུལ་གྱི་དུད་པས་དབང་
1-2-224b
པོའི་སྒོ་ཐམས་ཅད་འདུག །ཁྲའི་སྒོ་ར་ཟ་མ་ཏོག་གི་ནང་དུ་བཅུག་ལ་གསང་གནས་སུ་གདགས། ཡང་མེ་ཏོག་དང་འབྲས་བུ་དབྱར་བྱེད་ཞེས་བྱ་བ་དེ་ཡོངས་སུ་སྨིན་པ་ཞིབ་པར་བྱས་ཏེ། འོ་མ་ལ་བཏབ་སྟེ་ལྟོ་སྟོང་ལ་བཏང་ངོ་། །དེ་དག་གིས་བསྲུང་བར་མ་ནུས་ཏེ་ཐིག་ལེ་མི་ཐུབ་པ་སྙམ་བྱེད་ན་སྔགས་ཀྱིས་བསྲུང་བར་བྱ་སྟེ། རང་ཉིད་དབང་ཕྱུག་འཛིན་པ་དེ་ལྟ་བུ་གཅིག་ཏུ་བསྒོམ། སྔགས་འདི་དག་རྒྱུན་མི་ཆད་པ་བསྒོམ་བཟླས་བྱ་སྟེ། ཨོཾ་ཨ་རི་ཧ་ན་ཏ་ཙུག་ཙུག་ཅེས་བཟླས་པ་ཉིད་ཀྱིས་ཐུབ་པོ། །ཡང་གཞོན་ནུ་མ་འཇིག་རྟེན་པའི་ཆོས་ཀྱིས་མ་གོས་པས་བཀལ་བའི་སྐུད་པ་ལེབ་རྒན་རྩིའམ་གུར་གུམ་གྱིས་བཙོས་ལ་མདུད་པ་བདུན་བྱས་ནས་སྲོད་ལ་རིགས་སྔགས་བརྒྱ་རྩ་བརྒྱད་བཟླས་ཤིང་སྐེད་པ་ལ་བཅིངས་ན་ཁུ་བ་རྟག་ཏུ་འཛིན་པར་འགྱུར་རོ། །ཨོཾ་ཤུ་ཏྲཱ་ཧ་ར་ཧ་ཏི་བྷནྡྷ་མི་སི་ཐར་ཏེ་སྭཱ་ཧཱ། ཕྱག་ན་རྡོ་རྗེ་དབང་བསྐུར་བའི་རྒྱུད་ནས་གསུངས་སོ། །ཏིང་ངེ་འཛིན་གྱིས་བསྲུང་བ་ནི། བདེ་སྟོང་གི་ཏིང་ངེ་འཛིན་གསལ་བར་བསྟན་པས་འཛིན་ནོ། །ཡང་ན་རྡོ་རྗེའི་རྩེ་མོར་ཕཊ་སེར་པོས་བཀག་ནས་རླུང་གིས་བུམ་ནང་ནས་ཐིག་ལེ་བཏེགས་ནས་རྩ་དབུ་མའི་ནང་ན་ཡར་ལ་སྐྱ་རི་ལི་ལི་བྱུང་བར་བསམ་པས་ཀྱང་ཐིག་ལེ་འཛིན་ནོ། །ཡང་བསྟན་པ་རིགས་འཛིན་གྱི་རྒྱུད་ནས་ལུས་ངག་ཡིད་གསུམ་གྱི་བསྲུང་བ་འབྱུང་སྟེ། ལུས་རྡོ་རྗེའི་སྐྱིལ་
1-2-225a
༄༅། །ཀྲུང་བྱ། ལག་པ་ཁུ་ཚུར་བཅངས། རྒྱུ་མལ་ཚིགས་པ་ལ་བཅར། ལྕེ་ཡ་རྐན་ལ་སྦྱར། ལུས་གདུགས་ཤིང་གི་འཁོར་ལོ་ལྟར་བསྐོར། བུ་ཆུང་གི་སྤྱོད་ལམ་གྱིས་ལུས་ལ་ཁྱབ་པར་བྱའོ། །ངག་ཏུ་ཧཱུྃ་དྲག་ལ་རིང་བར་དྲང་ངོ་། །དམིགས་པ་ཧཱུྃ་གིས་འདྲེན། ཕཊ་ཀྱིས་འཕུལ་བའི་ཚུལ་གྱིས་འཕངས་ལ་བཟློག །དེ་ནས་སྟེང་རླུང་དལ་གྱིས་མནན་ནོ། །ལྷན་ཅིག་སྐྱེས་པའི་དགའ་བ་དང་། བདེ་བ་དང་། ཐིག་ལེ་ལ་བརྟེན་པའི་དྲོད་སྐྱེ། ཐིག་ལེ་རྩ་ནང་དུ་ཁྲེམས་པས་ཡོན་ཏན་ཐམས་ཅད་འབྱུང་ཞིང་ཐིག་ལེ་མི་ཉམས་སོ། །ཡོན་ཏན་དེ་རྣམས་དང་མི་ལྡན་པས་ཐིག་ལེ་ཉམས་པར་འགྱུར་ཏེ། བདེ་བ་སྐྱེས་པས་གང་བས་འཛག་པ་དང་། གདོན་དང་བག་ཆགས་ཀྱིས་རྨི་ལམ་དུ་འཛག་པ་དང་། ནད་གཞིས་ཆུ་དང་སྡོངས་ནས་འཛག་པ་དང་། དངོས་སུ་འཛག་པའོ། །དགའ་བ་དང་གདོན་ལ་སོགས་པའི་རྨི་ལམ་མམ་དངོས་སུ་འཛག་ན་གུ་གུལ་ནག་པོ་དང་། མིའི་ཀླད་པ་དང་། ཉུངས་ཀར་བསྲེས་པའི་ཐལ་བ། པདྨ་རཀྟ་དང་བཞི་པོ་དེ་ལེགས་པར་སྦྱར་ལ་སྲོད་ལ་གསང་གནས་དང་། རྐེད་པ་ལ་བཀུ་བྱུགས་བྱའོ། །ཡང་སྐུད་པ་ནག་པོ་ལ་མདུད་པ་ཉི་ཤུ་རྩ་གཅིག་བྱས། ལྷག་པ་ལྷའི་སྙིང་པོ་མང་དུ་བཟླས་ཏེ་སྐེད་པར་བཅིང་ངོ་། །བག་ཆགས་ལ་བུད་མེད་ཀྱི་གོས་ཀྱི་དྲི་མ་ཕན་ནོ། །རྨི་ལམ་དུ་ཐིག་ལེ་དཀར་པོ་འཆོར་བ་རྨིས་ན། ན་ཚ་འབྱུང་
1-2-225b
བའི་རྟགས་ཡིན་པས་རང་གི་ལོ་གྲངས་ཙམ་གྱི་གཟུངས་འདོན། དེ་བཞིན་དུ་ཐིག་ལེ་ནག་པོ་དང་། དམར་པོ་དང་། སེར་པོ་འཛག་པ་རྨིས་ན་དུས་མ་ཡིན་པར་འཆི་བ་ལ་སོགས་པ་དང་། ཏིང་ངེ་འཛིན་ཉམས་པ་དང་། རྫས་གུད་པའི་རྟགས་ཡིན་པས་བླ་མ་ལ་གསོལ་བ་གདབ་པ་དང་། ཚོགས་འཁོར་དང་། དཔའ་བོའི་སྟོན་མོ་ལ་སོགས་པ་བྱའོ། །རྨི་ལམ་ལ་འཁྲུལ་པར་ཤེས་པས་བཟང་ངན་དུ་མི་འཛིན་ན་རྟོག་པ་མེད་དོ། །ཆུ་དང་སྡོངས་ཏེ་འཛག་ན་ཟས་བཅུད་ཅན་བརྟེན། གཅན་གཟན་ལ་སོགས་པ་དྲོད་ཆེ་བའི་ལྤགས་པ་གསང་གནས་དང་སྐེད་པ་ལ་དཀྲིའོ། །ཐིག་ལེ་ཞོ་ཐིགས་ལྟ་བུར་འཛག་ན་འཁྲུལ་འཁོར་གསུམ་གྱིས་གནས་སུ་བསྐྱལ་ལ། བླ་མའི་སྐུ་ལྟེ་བ་ཡན་ཆད་དུ་བསྒོམ། གེགས་ཀྱི་རྟོག་པ་དེ་དག་ཐམས་ཅད་ཀྱི་ཐུན་མོང་གི་གཉེན་པོ་ནི་བྱུང་རྒྱལ་གྱི་གནད་དང་། རང་གི་ཏིང་ངེ་འཛིན་ལ་གནས་པས་སེལ་ལོ། །དེས་མ་སོལ་ན་སྙིང་ཐག་པ་ནས་བླ་མ་ལ་གསོལ་བ་གདབ་ཅིང་ཏིང་ངེ་འཛིན་རྒྱུན་བསྲིང་པ་ཁོ་ནས་སེལ་ལོ། །དེ་ལྟར་དབང་པོ་འབྲིང་གིས་ཡོངས་སུ་སྦྱངས་པ་ནི། སྦྱངས་པའི་དབང་པོ་རྣོན་པོ་ཞེས་བྱའོ། །ཟབ་པ་རྣམས་ཀྱི་ནང་ནས་མཆོག་ཏུ་གྱུར་པ་ཆེས་ཟབ་པར་རིག་པར་བྱའོ། །རང་བཞིན་གྱི་དབང་པོ་རྣོན་པོ་ཚེ་རབས་སྔ་མ་ལ་སྦྱངས་པའི་སྟོབས་ཀྱིས་ཚེ་འདི་ལ་རང་བཞིན་གྱིས་དབང་པོ་རྣོ་བའོ། །དེ་དག་སྟོང་པ་དང་
1-2-226a
༄༅། །བདག་མེད་པའི་རྣམ་པར་ཕྱག་རྒྱ་ཆེན་པོ་ཉིད་བསྟན་པར་བྱའོ། །འདི་ལྟར་སྣང་བ་འདི་ཐམས་ཅད་མེད་བཞིན་དུ་སྣང་བས་འཁྲུལ་པའི་སེམས་ཡིན་པས་གྲུབ་པ་མེད་ལ། སེམས་ཀྱང་དང་པོ་སྐྱེ་བ་མེད༑ བར་དུ་གནས་པ་མེད། ཐ་མར་འགག་པ་མེད་པས་གནས་ལུགས་དེ་ཉིད་ཀྱི་ངང་ལ་མ་བཅོས་པར་ཀློད་ནས་འཇོག་པའོ། །དེ་དག་ནི་དོན་རང་གི་མཚན་ཉིད་བརྗོད་པར་བྱ་བ་མ་ཡིན་ཀྱང་། གདུལ་བྱས་གོ་བར་བྱ་བའི་ཕྱིར་མིང་གི་ཚོགས་ལ་སོགས་པ་རྣམས་བསྟན་པའོ། །དེ་ཉིད་ལ་སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུའི་རང་བཞིན་མྱ་ངན་ལས་འདས་པ་ཞེས་བྱ་སྟེ། མ་སྐྱེས་པ། མ་འགགས་པ། གདོད་མ་ནས་ཞི་བ་རང་བཞིན་གྱིས་མྱ་ངན་ལས་འདས་པ་ཞེས་འབྱུང་ངོ་། །དེ་ཉིད་ལ་སངས་རྒྱས་ངོ་སྤྲོད་ཞེས་བྱ་སྟེ། སངས་རྒྱས་ནི་ཆོས་ཀྱི་སྐུའི་ངོ་བོ་ཡིན་ལ། དེ་དང་ངོ་སྤྲོད་པའི་ཕྱིར་རོ། །སེམས་དང་དེ་ཉིད་བཟུང་བ་དང་འཛིན་པ་མཐའ་དག་གིས་སྟོང་པའི་ཆ་ནས་འོད་གསལ་སྟོང་པ་ཉིད་ཅེས་བྱ་སྟེ། སེམས་རང་བཞིན་གྱིས་འོད་གསལ་བ་དང་། གློ་བུར་གྱི་དྲི་མ་མཐའ་དག་གིས་སྟོང་བའི་ཕྱིར་རོ། །སེམས་རང་རིག་པ་དེ་ཉིད་ཀྱང་སྐྱེ་བ་གནས་པ་འགག་པ་ལ་སོགས་པ་སྤྲོས་པའི་མཐའ་ཐམས་ཅད་ཀྱིས་སྟོང་པ་ནི་ཆོས་ཀྱི་བདག་མེད་པའི་དོན་ཕྱག་རྒྱ་ཆེན་པོ་ཞེས་བྱའོ། །དེ་གཉིས་དབྱེར་མེད་དུ་གནས་པ་ལ་ཆོས་ཀྱི་སྐུ་ཞེས་བྱ་སྟེ། 
1-2-226b
རང་བཞིན་ནམ་ངོ་བོ་ཉིད་ཡིན་པའི་ཕྱིར་རོ། །དེ་ཉིད་སྔོན་མེད་པས་གློ་བུར་དུ་བྱུང་བ་མ་ཡིན། སེམས་ཅན་ཐམས་ཅད་ཐོག་མ་ཉིད་ནས་ཆོས་ཀྱི་སྐུའི་ངོ་བོར་གནས་སོ། །སེམས་ཅན་ཡེ་ནས་སངས་རྒྱས་ལ། །འོན་ཀྱང་གློ་བུར་དྲི་མས་སྒྲིབས། །ཞེས་པ་དང་། སེམས་ནི་ཡེ་ཤེས་འབྱུང་བའི་རྒྱུ། །སངས་རྒྱས་གཞན་མི་ཚོལ་ཅིག །ཅེས་འབྱུང་གསུང་། དེ་རྟོགས་པར་འདོད་ན་གོལ་ས་རྣམ་པ་གསུམ་བཅད་དེ། སྒྲིབ་བྱེད་ཐེ་ཚོམ་གྱི་གོལ་ས་དང་། རྒྱུ་འབྲས་འཇིག་བྱེད་ཀྱི་གོལ་ས་དང་། ལོག་ཤེས་ལྟ་བའི་གོལ་ས། དང་པོ་ནི། ཆོས་སྐུ་ཁོ་ན་ས་སངས་རྒྱས་ཀྱི་ངོ་བོ་ཡིན་ན། སྐུ་གསུམ་དང་ཡེ་ཤེས་ལྔ་གསུངས་པ་མི་འགལ་ལམ་སྙམ་ན༑ ཆོས་ཀྱི་སྐུ་ཉིད་ལས་དོན་ལོགས་ན་མེད་དེ། གདུལ་བྱའི་དོན་སྣང་བ་ཉིད་ལ་དགོངས་སོ། །ཇི་ལྟར་སྣང་བ་ཞེ་ན། ཆོས་སྐུ་དེ་ཉིད་རྒྱུད་དག་པ་རྣམས་ལ་ཐེག་པ་ཆེན་པོའི་ཆོས་སྟོན་པའི་སྣང་བར་འབྱུང་བ་ལོངས་སྤྱོད་རྫོགས་པའི་སྐུ་ཞེས་བྱ་སྟེ། ཐེག་པ་ཆེན་པོའི་ཆོས་ལ་རྫོགས་པར་ལོངས་སྤྱོད་པའི་ཕྱིར་རོ། །དེ་ཉིད་གདུལ་བྱ་རྒྱུད་མ་དག་པ་རྣམས་ལ་སྤྲུལ་པའི་སྐུ་སྣ་ཚོགས་སྤྲུལ་ནས་སེམས་ཅན་གྱི་དོན་བྱེད་པའོ༑ ༑དེ་ཉིད་སྒྲིབ་པ་མཐའ་དག་གིས་དག་པའི་མེ་ལོང་ལྟ་བུའི་ཡེ་ཤེས་སོ། །གློ་བུར་གྱི་དྲི་མ་དང་མ་འདྲེས་པར་སོ་སོར་རྟོག་པའི་ཡེ་ཤེས་སོ། །ཆོས་ཀྱི་དབྱིངས་ལ་མི་གཡོ་བར་གནས་པས་ཆོས་ཀྱི་དབྱིངས་
1-2-227a
༄༅། །ཀྱི་ཡེ་ཤེས་སོ། །སེམས་ཅན་རྣམས་ཀྱི་དོན་འགྲུབ་པ་སྣང་བས་བྱ་བ་གྲུབ་པའི་ཡེ་ཤེས་ཞེས་བྱའོ། །གདུལ་བྱ་རྣམས་ལ་དེ་ལྟར་སྣང་ཡང་སྔོན་སེམས་ཅན་ཀྱི་དོན་ཁོ་ན་སྦྱངས་པའི་སྟོབས་ཀྱིས་སངས་རྒྱས་པ་ཡིན་གྱི་དེ་ལྟར་བྱའོ་སྙམ་པའི་རྟོག་པ་མི་མངའོ། །དེ་བཞིན་གཤེགས་པ་རྣམས་ནི་སྟུག་པོའི་གནས་སུ་ཐིམ་པ་ཡིན། མི་རྟོག་པ་འབའ་ཞིག་གིས་རབ་ཏུ་ཕྱེ་བའི་ཕྱིར་དཔའ་བོ་རྟག་ཏུ་མཉམ་བཞག་ཡིན་པར་ཤེས་པར་བྱའོ། །དེ་ལྟར་ཡིན་ཡང་ཡེ་ཤེས་ལོགས་པ་གཏན་མེད་པའི་མཚན་མར་མི་བཟུང་སྟེ། ཆོས་ཀྱི་དབྱིངས་ནི་རང་བཞིན་གྱིས་རྣམ་པར་དག་པ་དང་རྣམ་པར་མི་རྟོག་པའི་ཡེ་ཤེས་དབྱེར་མི་ཕྱེད་པའི་ངོ་བོར་གནས་པ་ལ་ཆོས་ཀྱི་སྐུ་འགྲུབ་པའི་ཕྱིར་རོ། །རྣམ་འབྱེད་རབ་དགའི་རྒྱུད་ལས་འདི་སྐད་དོ། །དབྱིངས་དང་ཡེ་ཤེས་དབྱེར་མེད་ལ། །ཆོས་ཀྱི་སྐུ་ཡི་ངོ་བོར་གྲུབ། །ཡུལ་ནི་ཆུང་དང་ཆེན་པོ་ཡིས༑ ༑སྣང་བས་གཟུགས་སྐུ་གཉིས་སུ་བརྗོད། །ཇི་ལྟར་ལྷ་ཡི་སིལ་སྙན་དག །རྟོག་པ་མེད་པར་སྒྲ་འབྱུང་བཞིན། །ཞེས་གསུངས་སོ། །རྒྱུ་འབྲས་འཇིག་བྱེད་ཀྱི་གོལ་ས་ནི། སེམས་སུ་ཤེས་པ་ཁོ་ནས་གྲོལ་ན་ལས་རྒྱུ་འབྲས་ལ་སོགས་པ་དགོས་པ་མེད་དོ་ཞེ་ན། སེམས་ཉིད་ཀྱི་སྣང་བ་ལ་ལས་རྒྱུ་འབྲས་བཞག་པ་ཡིན་ཏེ། སེམས་ཉིད་རྒྱུའི་དུས་ན་དགེ་བ་ལ་འཇུག་པ་ལྟར་སྣང་བ་ལ་བརྟེན་ནས། འབྲས་བུའི་དུས་ན་
1-2-227b
བདེ་འགྲོའི་སྣང་བར་འབྱུང་བ་ཡིན་ལ། རྒྱུའི་དུས་ན་མི་དགེ་བ་ལ་འཇུག་པར་སྣང་བ་ལ་བརྟེན་ནས། འབྲས་བུའི་དུས་ན་ངན་སོང་རྣམ་པ་གསུམ་གྱི་སྣང་བ་འབྱུང་བ་ཡིན་ཏེ། སེམས་ཉིད་མ་རྟོགས་པའི་དུས་ན་ལས་རྒྱུ་འབྲས་དགག་ཏུ་མི་བཏུབ་པས་ཤིན་ཏུ་ཟབ་པར་བལྟའོ། །རང་གི་ལྟ་བ་ངན་པ་ལ་མངོན་པར་ཞེན་པས་སེམས་ཉིད་རྟོགས་པར་མི་འགྱུར་ཏེ། ཕྱི་རོལ་པ་རྣམས་ནི་དོན་དམ་ཐམས་ཅད་ཀྱི་རྩ་བ་བདག་ཏུ་འཛིན་པ་དོན་དམ་དུ་གྲུབ་པར་འདོད་པས་ཤིན་ཏུ་འཁྲུལ། ནང་གི་སྡེ་པ་ཁ་ཅིག་བཟུང་འཛིན་ཡང་དག་ཏུ་གྲུབ་པར་འདོད་དེ། འཁྲུལ་པ་ལ་ཡང་དག་ཏུ་འདོད་པས་འཁྲུལ་ལོ། །སེམས་ཙམ་པ་སྣང་བ་སེམས་སུ་འདོད་པ་ཐམས་ཅད་ཀྱང་སེམས་ཉིད་དོན་དམ་དུ་འདོད་ལུགས་མི་འཐད། རང་རིག་སྔ་མ་ལ་ཕྱི་མ་སྐྱེ་བའི་སྐྱེ་འཇིག་དང་བཅས་པའོ། །དངོས་པོ་དོན་དམ་དུ་འདོད་པའི་ཕྱིར། དངོས་པོ་དོན་དམ་དུ་འདོད་པས་འཁྲུལ་ལོ། །ཤཱ་རིའི་བུ་ཆོས་ཐམས་ཅད་སྟོང་པ་ཉིད་དུ་བལྟ་ཞིང་། སྟོང་པར་མངོན་པར་ཞེན་པའི་གང་ཟག་དེ་དག་ནི་སླར་གསོར་མི་རུང་ངོ་། །ཞེས་པའི་ལུང་དང་། མེད་དགག་ཡིན་པའི་ཕྱིར་དང་། མདོ་སྡེ་པ་དང་མཚུངས་སོ། །ཞེས་པའི་རིགས་པ་གཉིས་ཀྱིས་གནོད་དོ། །རང་གི་ལྟ་བ་ངན་པ་ལ་མངོན་པར་ཞེན་པ་དེ་དག་བཏང་ལ། ཡང་དག་པའི་དོན་དང་། དེ་སྟོན་པའི་བླ་མ་ལ་ཚད་མར་བཟུང་བར་བྱའོ། །བླ་མ་དེ་
1-2-228a
༄༅། །ཉིད་ཕྱག་རྒྱ་ཆེན་པོ་སྟེ། ལྟ་བ་མཐའ་བྲལ་ཆེན་པོ། བསྒོམ་པ་ལམ་གཅིག་ཆོད། སྤྱོད་པ་དགག་བསྒྲུབ་མེད་པའོ། །འབྲས་བུ་སྤངས་ཐོབ་མེད་པའོ། །ཞེས་བྱ་བའོ། །སེམས་ཉིད་ལྷག་གི་སྐྱེས་པ་ཆོས་ཀྱི་སྐུ་ཉིད་ལ་རྒྱུན་དུ་བལྟའོ། །དེ་ཉིད་སྤྲོས་པའི་མཐའ་ཐམས་ཅད་དང་བྲལ་བའོ། །དབང་པོ་རབ་ཚེ་གཅིག་ཁོ་ན་ལ་སངས་རྒྱས་པར་ནུས་པས། དུས་མྱུར་ལ་འབྲས་བུ་ཆེན་པོ་ཞེས་བྱ་བའོ། །དེས་གྲོལ་བར་ནུས་སམ་ཞེ་ན། ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །འཇུར་བུས་བཅིངས་པའི་སེམས་ཉིད་འདི། །ཀློད་ན་གྲོལ་བར་ཐེ་ཚོམ་མེད། །ཅེས་པའི་དོན་གྱིས་སོ། །དེ་ཡང་ཚེ་གཅིག་ཁོ་ན་ལ་གྲོལ་བར་མ་ངེས་ཞེ་ན། དེས་ན་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གཅིག་གིས་དེ་དག་ཐམས་ཅད་བསྲེག །ཅེས་པ་དང་། སྤྲོས་ལྡན་གྲངས་མེད་གསུམ་སྤྱོད་ཀྱང་། །སྤྲོས་མེད་ཚེ་གཅིག་ཁོ་ནས་གྲོལ། །ཅེས་པའི་ཚུལ་འདི་བཟུང་ངོ་། །དེ་ལྟར་ན་ཚུལ་དེ་ཉིད་འགལ་ལོ་ཞེ་ན། དབང་པོ་རྣོ་དང་རྟུལ་བ་ཡིས། །སྤྲོས་དང་སྤྲོས་མེད་སྤྱོད་པ་དང་། །རྒྱུ་འབྲས་ཐེག་པའི་བྱེ་བྲག་གིས། །ཉེ་རིང་ལམ་དུ་བརྟག་པར་གྱིས། །ཞེས་པ་དབང་པོ་རྟུལ་པོ་སྤྲོས་པ་ལ་དགའ་བ་རྣམས། རྒྱུ་འབྲས་ཉིད་ཀྱི་ཐེག་པ་ལ་བརྟེན་ནས་གྲངས་མེད་པ་གསུམ་གྱིས་གྲོལ་བར་འགྱུར་བས། གཅིག་ཤོས་དེ་ལས་བཟློག་པར་
1-2-228b
བྱའོ་༑ ༑དེ་ལྟར་ན་ལོ་དང་ཟླ་བ་ལ་སོགས་པ་མངོན་དུ་དམིགས་པས་བསྒྱུར་དུ་མི་བཏུབ་པོ་ཞེ་ན། སྨྲས་པ། རྨི་ལམ་ན་ནི་ལོ་བརྒྱ་ཞིག །སྐད་ཅིག་དུ་ནི་འདུ་བར་འགྱུར། །དེ་བཞིན་དཔག་མེད་དུས་ཉིད་ཀྱང་། །སྐད་ཅིག་དུ་ནི་འདུ་བར་འགྱུར། །དུས་སྒྲོ་བཏགས་ཡིན་པས་དོན་ལ་གྲུབ་པ་མེད་དོ། །སྤྱོད་པ་ལ་དགག་བསྒྲུབ་མེད་དེ། སེམས་ཉིད་རྟོགས་པའི་རྣལ་འབྱོར་གྱིས། །ཤུགས་འབྱུང་གི་སྤྱོད་པ་མི་དགག་ཅིང་། །བཅོས་མའི་སྤྱོད་པ་མི་སྒྲུབ་ཏེ། །མ་བཅོས་ལྷུག་པ་སྤྱོད་པའི་རབ། །ཅེས་འབྱུང་ངོ་། །ལོག་པའི་རྣམ་པར་རྟོག་པའི་བག་ཆགས་ཀྱི་ཤུགས་ལ། དགག་བྱ་ཉོན་མོངས་པའི་རྣམ་པར་རྟོག་པ་གང་བྱུང་ཡང་མི་དགག་པར་སྐྱེ་བ་མེད་པའི་དོན་སྟོན་པའི་བླ་མར་ལྟ་སྟེ། ཉོན་མོངས་པ་དེ་ཉིད་སྐྱེ་བ་གནས་པ། འགག་པ་གསུམ་གྱིས་སྟོང་པའི་དོན་ལ་བཞག་པར་བྱའོ། །དེ་བཞིན་དུ་རྣམ་པར་རྟོག་པ་གང་བྱུང་ཡང་མི་དགག་པར་ལམ་དུ་ཁྱེར་ལ། དེ་ཉིད་སྐྱེ་བ་མེད་པའི་དོན་བསྟན་པར་བྱའོ། །བསྒོམ་པ་ལམ་ཆིག་ཆོད་ཡིན་ཏེ། སྦྱོར་བ་དང་། དངོས་གཞི་དང་། རྗེས་གསུམ་དང་བྲལ་ནས་གཅིག་ཁོ་ན་ཉམས་སུ་བླངས་པས་གྲོལ་བར་ངེས་སོ༑ ༑དེ་ལ་ལྷ་དང་སྔགས་མེད་དེ། །གཏོར་མ་སྦྱིན་བསྲེག་ཡོད་མ་ཡིན། །དེ་ལ་དམིགས་དང་རྫས་རྣམས་ནི། །རྣམ་རྟོག་ཡིན་ཏེ་གཤིས་ལ་མེད། །དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ཡོད་ན་ནོར་བུ་
1-2-229a
༄༅། །འཆིང་བུ་ལ་སོགས་པ་དགོས་པ་མེད་པ་བཞིན་ནོ། །འབྲས་བུ་ལ་སྤངས་ཐོབ་མེད་དེ། སྤང་བྱ་གཞི་ལས་མ་གྲུབ་པས། མེད་པ་ལ་མེད་པར་ཤེས་པར་བྱ་བ་ཙམ་ལས་སྤང་རྒྱུ་མེད་དོ། །སེམས་ཉིད་ཐོག་མ་ནས་སངས་རྒྱས་ཀྱི་ངོ་བོ་གནས་པས། སྔོན་མེད་པའི་འབྲས་བུ་ཐོབ་པ་མ་ཡིན་ནོ། །འདི་ལ་བསལ་བ་ཅི་ཡང་མེད། །བསྣན་པར་བྱ་བ་ཅུང་ཟད་མེད། །ཅེས་པ་དང་འཐུན་ལ། བློ་རེ་དོགས་ཀྱི་མཐའ་དང་བྲལ་བར་རིག་པར་བྱའོ། །སྙིགས་མའི་དུས་ན་ཟབ་མོའི་དོན་ཉིད་ལ། །མོས་ཤིང་སྤྱོད་པར་འདོད་པས་ཀུན་ནས་ནི། །བདུད་རྩི་ལྟ་བུའི་དོན་འདིར་གསལ་བྱས་ནས། །ཟླ་བ་ཡར་གྱི་ངོ་བཞིན་རྒྱས་པར་ཤོག ༑རྣམ་བཞི་རྒྱུད་གྲོལ་ཞེས་བྱ་བ་ཟབ་མོའི་དོན་མཐར་ཐུག་པ་རྫོགས་སོ།། །།
༄། །འདིའི་བརྒྱུད་པ།
འདིའི་བརྒྱུད་པ་ནི། རྒྱལ་པོ་ཨིནྡྲ་བོ་དྷི་བར་པས། བླ་མ་རིན་པོ་ཆེ་དུས་གསུམ་མཁྱེན་པ་ལ་གནང་། དེས་རྗེ་རིན་པོ་ཆེ་གངས་དཀར་བ་ལ་གནང་། དེས་བླ་མ་རིན་པོ་ཆེ་རཏྣ་ཀཱིརྟི་ལ་གནང་ངོ་། །དེས་བདག་དགེ་བ་ལ་གནང་བའོ།། །།
